୧୦୦ରୁ ଅଧିକ ପରିବାରଙ୍କୁ କରାଗଲା ସ୍ଥାନାନ୍ତର
ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଯମୁନାର ଜଳ ସ୍ତର ପୁଣିଥରେ ବୃଦ୍ଧି ପାଇବାରେ ଲାଗିଛି। ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ, ଯମୁନାର ବିପଦ ସଂକେତ ୨୦୫.୩୩ ମିଟର ଥିବାବେଳେ ଆଜି ଦିନ ୧୧ଟା ସୁଦ୍ଧା ଜଳସ୍ତର ୨୦୫.୩୨ ମିଟର ରେକର୍ଡ କରାଯାଇଛି। ଜଳସ୍ତର ବୃଦ୍ଧି ପଛର ମୁଖ୍ୟ କାରଣ ହେଉଛି ଯେ ଦିଲ୍ଲୀ-ଏନସିଆରରେ ଲଗାଣ ବର୍ଷା ଲାଗିରହିଛି। ଅଧିକାରୀଙ୍କ କହିବାନୁସାରେ, ଯମୁନାର ଜଳସ୍ତର ବଢ଼ୁଥିବାରୁ ନିମ୍ନ ଅଞ୍ଚଳରେ ବାସ କରୁଥିବା ୧୦୦ରୁ ଅଧିକ ପରିବାରକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଶୁକ୍ରବାର ସନ୍ଧ୍ୟାରେ ଜଳସ୍ତର ୨୦୪.୫୦ ମିଟରରେ ପହଞ୍ଚିଥିବାବେଳେ ଶନିବାର ଦିନ ଜଳସ୍ତର ୨୦୫.୩୩ ରେ ପହଞ୍ଚିଥିଲା। ସେହିପରି ଦିଲ୍ଲୀ ପ୍ରଶାସନ ପକ୍ଷରୁ ଖଦର ଅଞ୍ଚଳରେ ରହୁଥିବା ଲୋକଙ୍କୁ ସ୍ଥାନାନ୍ତର କରିଛି। ଅଗ୍ନିଶମ ବାହିନୀ, ନଗର ନିଗମ ଏବଂ ସ୍ୱାସ୍ଥ୍ୟ ବିଭାଗର ଦଳମାନଙ୍କୁ ସତର୍କ ରହିବାକୁ କୁହାଯାଇଛି।