ମୁମ୍ବାଇ: ଲୋକପ୍ରିୟ ଅଭିନେତା ତଥା ମଡେଲ ସିଦ୍ଧାର୍ଥ ଶୁକ୍ଲାଙ୍କର ଆଜି ପରଲୋକ ଘଟିଛି। ହୃଦଘାତ ଯୋଗୁଁ ମାତ୍ର ୪୦ବର୍ଷ ବୟସରେ ଆଜି ସକାଳେ ତାଙ୍କର ଦେହାନ୍ତ ହୋଇଛି। ମୁମ୍ବାଇର କୁପର ହସ୍ପିଟାଲକୁ ସିଦ୍ଧାର୍ଥଙ୍କୁ ଚିକିତ୍ସା ଲାଗି ଅଣାଯିବା ବେଳକୁ ତାଙ୍କର ମୃତ୍ୟୁ ହୋଇ ସାରିଥିଲା ବୋଲି ହସ୍ପିଟାଲ୍ ସୂତ୍ରରୁ ପ୍ରକାଶ। ରିୟଲିଟି ସୋ’ ବିଗବସ୍ ସିଜନ ୧୩ର ବିଜେତା ସିଦ୍ଧାର୍ଥ ଜଣେ ମଡେଲ୍ ଭାବେ କ୍ୟାରୟର ଆରମ୍ଭ କରିଥିଲେ। ଏହାପରେ ସେ ଟେଲି-ଧାରାବାହିକ ଜରିଆରେ ଅଭିନୟ ଜୀବନ ଆରମ୍ଭ କରିଥିଲେ। ତାଙ୍କ ଅଭିନୀତ ପ୍ରଥମ ଧାରାବାହିକ ଥିଲା ‘ବାବୁଲକା ଆଙ୍ଗନ୍ ଛୁଟେ ନା…’। ତେବେ ‘ବାଳିକା ବଧୂ’ ଧାରାବାହିକରେ ମୁଖ୍ୟ ଚରିତ୍ରରେ ଅଭିନୟ କରି ସେ ଲୋକପ୍ରିୟତା ଅର୍ଜନ କରିଥିଲେ। ମୁମ୍ବାଇରେ ୧୨ ଡିସେମ୍ବର ୧୯୮୦ରେ ଜନ୍ମ ଗ୍ରହଣ କରିଥିଲେ ସେ। ୨୦୦୮ରେ ପ୍ରସାରିତ ‘ବାବୁଲକା ଆଙ୍ଗନ ଛୁଟେ ନା’ ଟେଲି-ଧାରାବାହିକରେ ତାଙ୍କୁ ପ୍ରଥମେ ଦେଖିବାକୁ ମିଳିଥିଲା ଓ ଦର୍ଶକ ପସନ୍ଦ କରିଥିଲେ। କିନ୍ତୁ ‘ବାଳିକା ବଧୂ’ ସିଦ୍ଧାର୍ଥଙ୍କୁ ନୂଆ ପରିଚୟ ଦେଇଥିଲା ଓ ଏହା ଜରିଆରେ ଦେଶର ଘରେ ଘରେ ସେ ଚିହ୍ନାଚେହେରା ପାଲଟିଥିଲେ। ଏହାପରେ ସେ ବିଗବସ୍ ୧୩ର ବିଜେତା ବନି ଚର୍ଚ୍ଚାର ପରିସରକୁ ଆସିଥିଲେ। ଏଥିସହ ସେ ଟେଲି-ଧାରାବାହିକ ‘ଜାନେ ପେହେଚାନେ ସେ….ୟେ ଅଜନବୀ’, ‘ଲଭ ୟୁ ଜିନ୍ଦଗୀ’ ଏବଂ ‘ଝଲକ ଦିଖଲା ଯା-୬’, ‘ଫିୟର ଫାକ୍ଟର: ଖତରୋଁକି ଖିଲାଡ଼ି-୭’ ଆଦି ରିୟଲିଟି ସୋ’ରେ କାମ କରିଥିଲେ। କରନ ଜୋହରଙ୍କ ପ୍ରଯୋଜିତ ଫିଲ୍ମ ‘ହମ୍ପଟି ଶର୍ମାକି ଦୁଲହନିଆ’ ଜରିଆରେ ବଲିଉଡରେ ପାଦ ରଖିଥିଲେ ସିଦ୍ଧାର୍ଥ। ସିଦ୍ଧାର୍ଥ ଜଣେ ଇଣ୍ଟରନେଟ୍ ସେନସେନ୍ ଥିଲେ ଓ ତାଙ୍କର ବହୁ ପ୍ରଶଂସକ ରହିଛନ୍ତି। ଆଜି ତାଙ୍କର ମୃତ୍ୟୁ ଖବର ପ୍ରଚାରିତ ହେବା ପରେ ବଲିଉଡ ଓ ଟେଲି-ଶିଳ୍ପରେ ଶୋକର ଛାୟା ଖେଳିଯାଇଛି। ଅଭିନେତା ମନୋଜ ବାଜପାୟୀ, କପିଲ୍ ଶର୍ମା ଓ ହିତେନ୍ ତେଜୱାନୀ ପ୍ରମୁଖ ଖବର ଶୁଣିବା ମାତ୍ରେ ଟୁଇଟ୍ କରି ଶୋକବ୍ୟକ୍ତ କରିଛନ୍ତି।
ଆଉ ନାହାନ୍ତି ଲୋକପ୍ରିୟ ଟେଲି-ଅଭିନେତା ସିଦ୍ଧାର୍ଥ ଶୁକ୍ଲା
Share Now: