ଭୁବନେଶ୍ବର : ସେପ୍ଟେମ୍ବର ୫-୬ ଆଡ଼କୁ ବଙ୍ଗୋପସାଗରରେ ପୁଣି ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି। ଏହା ଦ୍ବାରା ପୂର୍ବ, ମଧ୍ୟ ଓ ଉତ୍ତର ଭାରତରେ ବର୍ଷା ପରିମାଣ ବଢିବ ବୋଲି ଘରୋଇ ପାଣିପାଗ ସଂସ୍ଥା ସ୍କାଏମେଟ୍ କହିଛି। ସ୍କାଏମେଟ୍ ପକ୍ଷରୁ କୁହାଯାଇଛି ଯେ ସେପ୍ଟେମ୍ବର ମାସରେ ଭଲ ବର୍ଷାର ସମ୍ଭାବନା ରହିଛି। ଏହି ମାସରେ ୩-୪ଟି ଘୂର୍ଣ୍ଣିବଳୟ କିମ୍ବା ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି। ଏପରି ହେଲେ ଅଗଷ୍ଟ ମାସରେ ଦେଖାଦେଇଥିବା ବର୍ଷା ନିଅଣ୍ଟ ସେପ୍ଟେମ୍ବରରେ ଭରଣା ହୋଇପାରେ। ସୂଚନା ଯୋଗ୍ୟ ଯେ, ଗତ ଅଗଷ୍ଟ ମାସରେ ଦେଶରେ ସ୍ବାଭାବିକଠାରୁ ୨୪ ପ୍ରତିଶତ ନିଅଣ୍ଟିଆ ବର୍ଷା ହୋଇଛି। ଅଗଷ୍ଟ ମାସ ଏକ ପ୍ରମୁଖ ମୌସୁମୀ ମାସ ହୋଇଥିବାବେଳେ ଏହି ମାସରେ ହାରାହାରି ୨୫୮.୨ ମିଲିମିଟର ବର୍ଷା ହୋଇଥାଏ। କିନ୍ତୁ ଚଳିତ ବର୍ଷ ଅଗଷ୍ଟ ମାସରେ ମାତ୍ର ୧୯୬.୨ ମିଲିମିଟର ବର୍ଷା ହୋଇଛି। ଏପରିକି ଅଗଷ୍ଟ ୩ୟ ସପ୍ତାହରେ ବର୍ଷା ନିଅଣ୍ଟ ପରିମାଣ ୪୦ ପ୍ରତିଶତ ରହିଥିଲା। କିନ୍ତୁ ମାସ ଶେଷ ବେଳକୁ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଭଲ ବର୍ଷା କରିବାରେ ସକ୍ଷମ ହୋଇଥିଲା।
