ଆଉ ୨ଶହଙ୍କୁ ମିଳିବ, ୨୩ ଥାନାରେ ପଡ଼ିରହିଛି ୨ହଜାରରୁ ଉର୍ଦ୍ଧ୍ବ ଗାଡ଼ି
ଭୁବନେଶ୍ୱର : ଖୁବ୍ଶୀଘ୍ର ରାଜଧାନୀ ଓ ଆଖପାଖ ଅଞ୍ଚଳର ହଜାରେରୁ ଉର୍ଦ୍ଧ୍ବ ଲୋକ ସେମାନଙ୍କ ଚୋରି ଗାଡ଼ି ଫେରିପାଇବେ। ଦୀର୍ଘଦିନ ତଳେ ଚୋରି ହୋଇଥିବା ଗାଡ଼ିଗୁଡ଼ିକୁ ଗାଡ଼ିମାଲିକଙ୍କୁ ଫେରାଇବା ପାଇଁ କମିସନରେଟ୍ ପୁଲିସ ପ୍ରୟାସ ଆରମ୍ଭ କରିଛି। ଗୁରୁବାର ଦିନ କମିସନରେଟ୍ ପୁଲିସ କାର୍ଯ୍ୟାଳୟରେ ଅନୁଷ୍ଠିତ ଏକ ସ୍ବତନ୍ତ୍ର ମେଳା କାର୍ଯ୍ୟକ୍ରମରେ ଡିସିପି ଉମାଶଙ୍କର ଦାଶ ପ୍ରଥମ ପର୍ଯ୍ୟାୟରେ ୨୨ଗାଡ଼ି ମାଲିକଙ୍କୁ ସେମାନଙ୍କ ଚୋରି ଗାଡ଼ି ହସ୍ତାନ୍ତର କରିଛନ୍ତି। ସେଥିରୁ ଜଟଣି ଥାନା ଅଞ୍ଚଳର ୧୧ଟି, ଖଣ୍ଡଗିରି ଥାନା ଅଞ୍ଚଳର ୩ଟି ଏବଂ ବଡ଼ଗଡ଼ ଥାନା ଅଞ୍ଚଳର ୮ଟି ଚୋରି ଗାଡ଼ି ଥିବା ଜଣାପଡ଼ିଛି। ଭୁବନେଶ୍ବର ସହରାଞ୍ଚଳର ଥିବା ୨୩ ଥାନା ଅଞ୍ଚଳରେ ୨ ହଜାରରୁ ଉର୍ଦ୍ଧ୍ବ ଚୋରି ଗାଡ଼ିକୁ ଜବତ କରିଛି ପୁଲିସ। ଏହି ଜବତ ଗାଡ଼ିଗୁଡ଼ିକ ବିଭିନ୍ନ ଥାନାରେ ପଡ଼ିପଡ଼ି ନଷ୍ଟ ହେବାକୁ ବସିଥିବାବେଳେ କମିସନରେଟ୍ ପୁଲିସ ପକ୍ଷରୁ ଏହି ଗାଡ଼ିଗୁଡ଼ିକୁ ଏହାର ମାଲିକମାନଙ୍କୁ ଫେରାଇବାକୁ ପ୍ରୟାସ ଆରମ୍ଭ ହୋଇଛି। ଗାଡ଼ି ନମ୍ବର ଓ ଚେଚିସ୍ ନମ୍ବରୁ ଗାଡ଼ି ମାଲିକଙ୍କୁ ଚିହ୍ନଟ କରି ସେମାନଙ୍କ ଡାଟା ବେସ୍ ପ୍ରସ୍ତୁତ ହୋଇଛି। ବର୍ତ୍ତମାନ ସୁଦ୍ଧା ୨ଶହରୁ ଉର୍ଦ୍ଧ୍ବ ଗାଡ଼ିମାଲିକଙ୍କୁ ଚିହ୍ନଟ କରାଯାଇଛି। ବିଭିନ୍ନ ପର୍ଯ୍ୟାୟରେ ସେମାନଙ୍କୁ ଏହି ମେଳା ମାଧ୍ୟମରେ ଗାଡ଼ିଗୁଡ଼ିକୁ ହସ୍ତାନ୍ତର କରାଯିବ। ସେହିପରି କେତେକ ଚୋରି ଗାଡ଼ିର ଇନ୍ସ୍ୟୁରାନ୍ସ କ୍ଲେମ୍ କରି ଗାଡ଼ିମାଲିକମାନେ ଏ ବାବଦ ଅର୍ଥ ନେଇ ସାରିଥିବାରୁ ଇନ୍ସ୍ୟୁରାନ୍ସ ସଂସ୍ଥାଗୁଡ଼ିକ ସହ ମଧ୍ୟ ଯୋଗାଯୋଗ କରାଯାଇଛି। ଯେଉଁଗାଡ଼ି ଗୁଡ଼ିକର ଇନ୍ସ୍ୟୁରାନ୍ସ କ୍ଲେମ୍ ହୋଇଥିବ, ସେଗୁଡ଼ିକୁ ସମ୍ପୃକ୍ତ ଇନ୍ସ୍ୟୁରାନ୍ସ ସଂସ୍ଥାକୁ ଦିଆଯିବ। ଗାଡ଼ି ମାଲିକଙ୍କୁ ଏବଂ ଇନ୍ସ୍ୟୁରାନ୍ସ ସଂସ୍ଥାକୁ ଗାଡ଼ି ହସ୍ତାନ୍ତର ପରେ ବାକି ଯେଉଁ ଗାଡ଼ିଗୁଡ଼ିକ ରହିଯିବ ସେଗୁଡ଼ିକୁ ନିଲାମ୍ କରାଯିବ ବୋଲି ଡିସିପି ଶ୍ରୀ ଦାଶ କହିଛନ୍ତି। ଫଳରେ ବର୍ଷ ବର୍ଷ ଧରି ଥାନା ଗୁଡ଼ିକରେ ଅଯଥା ଜାଗା ମାଡ଼ି ବସିଥିବା ସ୍ଥାନକୁ ଖାଲି କରାଯାଇ ଥାନାର ସୌନ୍ଦର୍ଯ୍ୟ ବୃଦ୍ଧି କରାଯିବ।