ନୂଆଦିଲ୍ଲୀ : ସୁପ୍ରିମକୋର୍ଟ ଦେଶଦ୍ରୋହ ଆଇନ (ଆଇପିସି ଧାରା ୧୨୪-କ) ଉପରେ ସ୍ଥଗିତାଦେଶ ଲଗାଇ ସରକାରଙ୍କୁ ସମୀକ୍ଷା କରିବାକୁ ନିର୍ଦ୍ଦେଶ ଦେଇଥିବାବେଳେ ସରକାରଙ୍କ ପକ୍ଷରୁ କୁହାଯାଇଛି ଯେ ଏ ନେଇ ଖୁବଶୀଘ୍ର ରାଜ୍ୟ ସରକାରମାନଙ୍କୁ ଆବଶ୍ୟକ ଗାଇଡଲାଇନ ଜାରି କରାଯିବ। କେନ୍ଦ୍ର ଗୃହ ସଚିବ ଏନେଇ ରାଜ୍ୟ ସରକାରମାନଙ୍କୁ ଆବଶ୍ୟକ ପରାମର୍ଶ ଜାରି କରିବେ ଯେପରିକି ଏହାର ଅପବ୍ୟବହାର ହୋଇ ନପାରିବ। ଆଜି ସୁପ୍ରିମକୋର୍ଟ ଦେଶଦ୍ରୋହ ଆଇନକୁ ସରକାରଙ୍କ ଦ୍ବାରା ସମୀକ୍ଷା ହେବା ପର୍ଯ୍ୟନ୍ତ ସ୍ଥଗିତ ରଖିବା ସହ ଏହି ଆଇନ ଉପରେ ନୂଆ ଏଫଆଇଆର ରୁଜ୍ଜୁ ଉପରେ କଟକଣା ଲଗାଇଥିଲେ। ଏହା ସହିତ ବକେୟା ମାମଲା, ଚାଲିଥିବା ମାମଲା ଉପରେ ସ୍ଥଗିତାଦେଶ ଲଗାଇଥିଲେ ସୁପ୍ରିମକୋର୍ଟ। ଗତ ସୋମବାରଦିନ କେନ୍ଦ୍ର ସରକାର ସୁପ୍ରିମକୋର୍ଟଙ୍କ ନିକଟରେ ଏକ ସତ୍ୟପାଠ କରି ଜଣାଇଥିଲେ ଯେ ସୁପ୍ରିମକୋର୍ଟ ଏହି ଆଇନର ତର୍ଜମା କରି ସମୟ ଅପଚୟ କରିବା ଉଚିତ ନୁହେଁ ଓ ସରକାରଙ୍କ ଦ୍ବାରା ହେବାକୁ ଥିବା ସମୀକ୍ଷାକୁ ଅପେକ୍ଷା କରିବା ଉଚିତ। ତେବେ କେତେକ ଗଣମାଧ୍ୟମ ରିପୋର୍ଟ ଅନୁସାରେ ସରକାର ଦେଶଦ୍ରୋହ ଆଇନକୁ ସଂପୂର୍ଣ୍ଣ ପ୍ରତ୍ୟାହାର କରିନେବାର ସମ୍ଭାବନା କମ। ତେବେ ସରକାରଙ୍କ ପକ୍ଷରୁ କରାଯିବାକୁ ଥିବା ସମୀକ୍ଷା ପରେ ଏହାର ଯେପରି ଅପବ୍ୟବହାର ନହେବ ନେଇ ନେଇ କେତେକ ବ୍ୟବସ୍ଥା କରାଯିବ।
