ନୂଆଦିଲ୍ଲୀ : ଆଫଗାନିସ୍ତାନରୁ ଭାରତକୁ ଆସୁଥିବା ନିଶାଦ୍ରବ୍ୟ ଉପରେ ମୁହଁ ଖୋଲିଛି ତାଲିବାନ। ଏଥିପାଇଁ ଆମେରିକା ଦାୟୀ ବୋଲି ତାଲିବାନର ଜଣେ ବରିଷ୍ଠ ନେତା କହିଛନ୍ତି। ଏକ ଭାରତୀୟ ଗଣମାଧ୍ୟମକୁ ସାକ୍ଷାତକାର ଦେଇ ଆଫଗାନିସ୍ତାନର ବୈଦେଶିକ ମନ୍ତ୍ରୀ ଅମିର ଖାଁ ମୁତାକି କହିଛନ୍ତି ଯେ ୨୦୦୧ରେ ଆଫଗାନିସ୍ତାନ ଉପରେ ଆମେରିକାର ଆକ୍ରମଣ ପୂର୍ବରୁ ଦେଶରେ କୌଣସି ନିଶାଦ୍ରବ୍ୟ ଉତ୍ପାଦନ ହେଉନଥିଲା। କିନ୍ତୁ ଗତ ୨୦ ବର୍ଷ ହେଲା ଆଫଗାନିସ୍ତାନରେ ଚାଲିଥିବା ଆମେରିକା ସମର୍ଥିତ ସରକାରଙ୍କ ଅମଳରେ ନିଶାଦ୍ରବ୍ୟ ଉତ୍ପାଦନ ଓ କାରବାର ଚରମ ସୀମାରେ ପହଞ୍ଚିଥିଲା। ଏହି ନିଶାଦ୍ରବ୍ୟ ସୀମା ପାର କରି ଭାରତ ଓ ଅନ୍ୟ ଦେଶକୁ ଯାଉଥିଲା। ମାତ୍ର ଗତ ବର୍ଷ ଆଫଗାନିସ୍ତାନରେ ତାଲିବାନ ଶାସନ ଆରମ୍ଭ ହେବା ପରେ ନିଶାଦ୍ରବ୍ୟ ଉତ୍ପାଦନ ଉପରେ ସଂପୂର୍ଣ୍ଣ ନିଷେଧାଜ୍ଞା ଲଗାଯାଇଛି। ଫଳରେ ଏବେ ନୂଆ ନିଶାଦ୍ରବ୍ୟ ଉତ୍ପାଦନ ହେଉନାହିଁ ଓ ଯାହାକିଛି ବଳକା ଥିବ ସେଗୁଡ଼ିକ ବୋଧହୁଏ ଭାରତ ଓ ଅନ୍ୟଦେଶକୁ ଚୋରାଚାଲାଣ ହେଉଥିବ। କିନ୍ତୁ ସେଗୁଡ଼ିକ ବି ଖୁବଶୀଘ୍ର ବନ୍ଦ ହୋଇଯିବ। ସୂଚନାଯୋଗ୍ୟ ଯେ ଗତ ୨୬ ତାରିଖ ଦିନ ଗୁଜୁରାଟର ମୁଦ୍ରା ବନ୍ଦରରୁ ପ୍ରାୟ ୫୦୦ କୋଟି ଟଙ୍କା ମୂଲ୍ୟର କୋକେନ ଜବତ ହୋଇଥିଲା। ଏକ କଣ୍ଟେନରେ ଟାଲକମ ପାଉଡର ରୂପରେ ସେଗୁଡ଼ିକର ଚୋରା ଚାଲାଣ କରାଯାଉଥିବା ବେଳେ ଧରା ପଡ଼ିଥିଲା।
ଆଫଗାନିସ୍ତାନରୁ ଭାରତକୁ ନିଶାଦ୍ରବ୍ୟ ଚୋରାଚାଲାଣ ପାଇଁ ଆମେରିକା ଦାୟୀ : ତାଲିବାନ
Share Now: