ଜୟପୁର : ରାଜସ୍ଥାନ ଉଦୟପୁରରେ ଏକ ଆଚମ୍ବିତ କରିଦେବା ଭଳି ଘଟଣା ଦେଖିବାକୁ ମିଳିଛି। ମୋବାଇଲ ଫୋନ୍ ବ୍ୟାଟେରି ଫାଟିବାରୁ ଏକ ୫ ବର୍ଷୀୟ ଶିଶୁ କନ୍ୟାର ପାଟି ଫାଟିଯାଇଛି। ଏଭଳି ଦୁର୍ଘଟଣାର ଶିକାର ଶିଶୁକୁ ଚିକିତ୍ସା ଲାଗି ପରିବାର ଲୋକେ ସ୍ଥାନୀୟ ଏମବି ହସପିଟାଲରେ ଶୁକ୍ରବାର ସକାଳ ୮.୩୦ରେ ଭର୍ତ୍ତି କରିଥିଲେ। ଶିଶୁର କ୍ଷତ ବିକ୍ଷତ ଚେହେରା ଦେଖି ଡାକ୍ତର ବି ଚକିତ ହୋଇଗଲେ । କାହିଁକିନା ବ୍ୟାଟେରି ବିସ୍ଫୋରଣରେ ଶିଶୁର ସଂପୂର୍ଣ୍ଣ ମୁହଁ ଛିଣ୍ଡି ରକ୍ତରେ ଜୁଡୁବୁଡୁ ହୋଇଥିଲା।
ଅବସ୍ଥା ଗୁରୁତର ଥିବାରୁ ଏମରଜେନ୍ସିରୁ ଡାକ୍ତରମାନେ ଶିଶୁକୁ ଇଏନଟି ଓପିଡିକୁ ନେଇଥିଲେ । ମୁହଁ ପୁରା ଫାଟି ଯାଇଥିଲା, ତା’ପରେ ସାଙ୍ଗେ ସାଙ୍ଗେ ସେଠାରୁ ଅହମ୍ମଦାବାଦର ବୋଲକରକୁ ନେଇଯାଇଥିଲେ । ପରିବାର ଲୋକଙ୍କ କହିବାନୁସାରେ ଶିଶୁ ଘରେ ମୋବାଇଲ ସହିତ ଖେଳୁଥିବା ସମୟରେ ଖେଳ ଖେଳରେ ବ୍ୟାଟେରିକୁ ପଥରରେ ପିଟି ଦେଇଥିଲା । ତା’ପରେ ମୋବାଇଲ ବିସ୍ଫୋରଣ ଘଟିଥିଲା । ବିସ୍ଫୋରଣ ଏତେ ବଡ ଧରଣର ଥିଲା ଯେ ପିଲାଟିର ପାଟି ଛିଣ୍ଡି ପଡିଲା ଓ ସେ ବେହୋସ୍ ହୋଇଗଲା ।
ମୋବାଇଲ ବିଶେଷଜ୍ଞଙ୍କ ମୁତାବକ ମୋବାଇଲ ଫୋନ୍ ବ୍ୟାଟେରିରେ ଡ୍ରାଏ ସେଲ୍ ଥାଏ, ଯେଉଁଥିରେ କାର୍ବନ ବା ଲିଥିୟମ ଆୟନ ଲିକ୍ୱିଡ ଥାଏ। ଏହା ଓଭର ଚାର୍ଜିଙ୍ଗ ହେବା ଦ୍ୱାରା ଗରମ ହେବା ପରେ ଗ୍ୟାସ୍ ରିଲିଜ୍ କରେ, ଯଦ୍ୱାରା ବ୍ୟାଟେରି ଫୁଲିଯାଏ । ଏହି ଫୁଲିଥିବା ବ୍ୟାଟେରିକୁ ଜୋରରେ ମାରିଲେ ବା ଅଧିକ ଗରମ ହେଲେ ସଟ୍ ସାର୍କିଟ ହୋଇ ବିସ୍ଫୋରଣ ହୋଇଯାଏ । ଏହି ବିସ୍ଫୋରଣ ବହୁତ୍ ବିପଦଜନକ ଥାଏ ।
