ଜେନିଭା : ରୁଷ-ୟୁକ୍ରେନ ଯୁଦ୍ଧ ଯୋଗୁଁ ଆଉ ଏକ ବଡ଼ ବିପଦର ସମୁଖୀନ ହେବାକୁ ଯାଉଛି ୟରୋପ। ୟୁକ୍ରେନରେ ଥିବା ୟୁରୋପର ସବୁଠାରୁ ବଡ଼ ପରମାଣୁ ଶକ୍ତି କେନ୍ଦ୍ର ଜାପୋରିଝଜିଆ ଏବ ବିପଜ୍ଜନକ ଅବସ୍ଥାରେ ପହଞ୍ଚିଯାଇଛି। ଏହା ନିୟନ୍ତ୍ରଣହୀନ ଅବସ୍ଥାକୁ ଚାଲିଯାଇଛି ବୋଲି ଜାତିସଂଘ ପରମାଣୁ ମୁଖ୍ୟ ରାଫେଲ ଗ୍ରୋସି କହିଛନ୍ତି। ସେ କହିଛନ୍ତି ଯେ ଆଣବିକ ନିରାପତ୍ତାର ସବୁ ନିୟମର ଉଲ୍ଲଙ୍ଘନ କରାଯାଇଛି। ଏଣୁ ଆଗକୁ ଏହା ଏକ ବଡ଼ ତଥା ଭୟଙ୍କର ବିପଦରେ ପରିଣତ ହେବାକୁ ଯାଉଛି। କୌଣସି ପ୍ରଳୟଙ୍କରୀ ଅଘଟଣ ଘଟିବା ପୂର୍ବରୁ ଉଭୟ ୟୁକ୍ରେନ ଓ ରୁଷ ଜାତିସଂଘର ପରମାଣୁ ବିଶେଷଜ୍ଞମାନଙ୍କୁ ତାହାର ପରିଦର୍ଶନ ପାଇଁ ଅନୁମତି ଦିଅନ୍ତୁ। ସେ କହିଛନ୍ତି ଯେ, ଗୋଟିଏ ପରମାଣୁ କେନ୍ଦ୍ର ଚାଲିବା ପାଇଁ ପ୍ରତିଦିନ ବିଭିନ୍ନ ଜରୁରୀ ସମଗ୍ରୀ ଆବଶ୍ୟକ କରେ। କିନ୍ତୁ ଯୁଦ୍ଧ ଯୋଗୁଁ ଏସବୁ ସାମଗ୍ରୀ ଓ ଉପକରଣ ପରମାଣୁ ଶକ୍ତି କେନ୍ଦ୍ରକୁ ପହଞ୍ଚିପାରୁନାହିଁ। ନିରାପତ୍ତା ଦୃଷ୍ଟିକୋଣରୁ ଗୋଟିଏ ପରମାଣୁ ଶକ୍ତି କେନ୍ଦ୍ରରେ ଯେଉଁସବୁ ଘଟଣା ଘଟିବା ଉଚିତ ନୁହେଁ, ସେସବୁ ସେଠାରେ ଘଟୁଛି। ଏଣୁ ମୂଳରୁ ହିଁ ଆମେ ଦାବି କରୁଛୁ କି ଆମକୁ ସେଠାକୁ ଯିବାକୁ ଦିଆଯାଉ ଓ ନିରାପତ୍ତା ଯାଞ୍ଚ ଓ ରକ୍ଷଣାବେକ୍ଷଣ କାମ କରିବାକୁ ଦିଆଯାଉ। ପୂର୍ବରୁ ଚେର୍ଣ୍ଣୋବିଲରେ ବି ତାହା କରାଯାଇଥିଲା।
