ଭୁବନେଶ୍ବର: ବଲାଙ୍ଗୀର ଓ ବରଗଡ଼ ଜିଲ୍ଲାକୁ ଲାଗିଥିବା ଗନ୍ଧମାର୍ଦ୍ଧନ ପାହାଡ଼ ଅଞ୍ଚଳରେ ଆଜି ସୁରକ୍ଷା ବାହିନୀ (ଏସ୍ଓଜି ଯବାନ) ଓ ନକ୍ସଲଙ୍କ ମଧ୍ୟରେ ଗୁଳି ବିନିମୟ ହୋଇଛି। ପୁଲିସର ଗୁଳିରେ ୨ ଜଣ ମହିଳା ନକ୍ସଲଙ୍କ ମୃତ୍ୟୁ ଘଟିଛି। ୨ଟି ମହିଳା ନକ୍ସଲଙ୍କ ମୃତଦେହ ଉଦ୍ଧାର ହୋଇଛି। ରାଜ୍ୟ ପୁଲିସ ମହାନିର୍ଦ୍ଦେଶକ ସୁନୀଲ କୁମାର ବଂଶଲ ଏହି ସୂଚନା ଦେଇଛନ୍ତି। ଡିଜିପି କହିଛନ୍ତି ଯେ, ଗନ୍ଧମାର୍ଦ୍ଧନ ପାହାଡ଼ରେ ମାଓବାଦୀମାନେ ଥିବା ନେଇ ଏସ୍ଓଜି ଯବାନଙ୍କୁ ବିଶ୍ବସ୍ତ ସୂତ୍ରରୁ ସୂଚନା ମିଳିଥିଲା। ବିଶ୍ବସ୍ତ ସୂଚନା ଆଧାରରେ ସୁରକ୍ଷାକର୍ମୀମାନେ ସର୍ଚ୍ଚ ଅପରେସନ ଆରମ୍ଭ କରିଥିଲେ। ତେବେ ସୁରକ୍ଷାକର୍ମୀଙ୍କୁ ଦେଖ ନକ୍ସଲମାନେ ବିଚଳିତ ହୋଇଯାଇଥିଲେ। ସେମାନେ ପୁଲିସ ଉପରକୁ ଗୁଳି କରିଥିଲେ। କିନ୍ତୁ ପୁଲିସର ପାଲଟା ଗୁଳିରେ ୨ ଜଣ ନକ୍ସଲ ନିହତ ହୋଇଥିଲେ। ଏହି ଗୁଳି ବିନିମୟ ପ୍ରାୟ ଅଧଘଣ୍ଟା ଧରି ଜାରି ରହିଥିଲା। ଗୁଳିବିନିମୟ ପରେ ଘଟଣାସ୍ଥଳରୁ ମାଓବାଦୀଙ୍କ ୟୁନିଫର୍ମ, ୨ଟି ଇନ୍ସାଫ୍ ରାଇଫଲ୍ସ ଜବତ ହୋଇଛି। ଜଣାପଡ଼ିଛି ଯେ, ମାଓବାଦୀ ଦ୍ବୟ ଏସିଏମ୍ ରାଙ୍କର ଥିଲେ। ସେମାନେ ଛତିଶଗଡ଼ର ବୋଲି ଜଣାପଡ଼ିଛି। ନିହତ ହୋଇଥିବା ମାଓବାଦୀମାନେ ବଲାଙ୍ଗୀର-ବରଗଡ଼-ମହାସମୁନ୍ଦ ଡିଭିଜନରେ ମୁତୟନ ଥିଲେ।
୨ ଜଣ ମାଓବାଦୀଙ୍କ ଉପରେ ୪ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିଲା। ଘଟଣାସ୍ଥଳରେ ୫ଟି ଏସଓଜି ଟିମ ନିୟୋଜିତ ଥିଲେ। ଗନ୍ଧମାର୍ଦ୍ଧନ ପାହାଡ଼ ଅଞ୍ଚଳରେ ସୁରକ୍ଷା ବାହିନୀ ନିୟମିତ ଭାବେ ସର୍ଚ୍ଚ ଅପରେସନ ଜାରି ରଖିବ। ମାଓବାଦୀଙ୍କ ନିକଟରେ ଅପିଲ କରାଯାଉଛି ଯେ, ସେମାନେ ହିଂସା ଛାଡ଼ନ୍ତୁ। ସରକାରଙ୍କ ବିକାଶ କାମରେ ଭାଗିଦାରୀ ହୋଇ ମୂଳସ୍ରୋତରେ ଯୋଡ଼ି ହୁଅନ୍ତୁ ବୋଲି ଡିଜିପି ଶ୍ରୀ ବଂଶଲ କହିଛନ୍ତି।
