ଭୁବନେଶ୍ୱର: ସମଗ୍ର ଦେଶ ସହିତ ଓଡ଼ିଶାରେ ମଧ୍ୟ ବୁଧବାର ରଙ୍ଗର ପର୍ବ ‘ହୋଲି’ ଧୁମ୍ଧାମରେ ପାଳିତ ହୋଇଯାଇଛି। ହୋଲି ଖେଳ ପରେ ଅତ୍ୟଧିକ ଖୁସି ହେବା କିଛି ଲୋକଙ୍କ ପାଇଁ ମହଙ୍ଗା ପଡ଼ିଛି। ଅନେକ ଲୋକଙ୍କ ପାଇଁ ଦୁଃଖ ଆଣି ଦେଇଛି। ରାଜ୍ୟର ବିଭିନ୍ନ ସ୍ଥାନରେ ଅଘଟଣ ଘଟିଛି। ପାଣିରେ ବୁଡ଼ି, ସଡ଼କ ଦୁର୍ଘଟଣା ଓ ହିଂସାକାଣ୍ଡରେ ୮ ଜଣଙ୍କର ମୃତ୍ୟୁ ହୋଇଥିବା ବେଳେ ୧୭ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ମୃତକମାନଙ୍କ ମଧ୍ୟରେ ୨ ଭାଇ ଓ ଜଣେ ନାବଳକ ମଧ୍ୟ ସାମିଲ ଅଛନ୍ତି। କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ କେଶପୁର ପଞ୍ଚାୟତ ମୂଷାଡ଼ିହା ଗାଁରେ ଅଭାବନୀୟ ଘଟଣା ଘଟିଛି। ଏଠାରେ ଖେଳ ସାରି ଗାଧୋଇବା ବେଳେ ୨ ଭାଇ ବ୍ରାହ୍ମଣୀ ନଦୀରେ ବୁଡ଼ିଯାଇଛନ୍ତି। ସେସାନଙ୍କର ମୃତଦେହ ଉଦ୍ଧାର କରାଯାଇଛି।
ରଙ୍ଗର ପର୍ବରେ ହୋଲିରେ ଅଘଟଣ ଘଟିଛି। ନିଶା ଖାଇ ଗାଡ଼ି ଚଳାଉଥିବା ବେଳେ ଭୁବନେଶ୍ୱରରେ ଦୁର୍ଘଟଣା ଘଟିଛି। ଭୁବନେଶ୍ୱର ଉପକଣ୍ଠ ଜରିପାଟାଣରେ ଜଣଙ୍କ ମୃତ୍ୟୁ ହୋଇଥିବା ବେଳେ ସିଆରପି ଓଭର ବ୍ରିଜ୍ ଉପରେ ଦୁର୍ଘଟଣାରେ ଆଉ ଜଣେ ଯୁବକଙ୍କ ଜୀବନ ଯାଇଛି। ଚଳିତବର୍ଷ ହୋଲିରେ ନିଶାଗ୍ରସ୍ତ ହୋଇ ଅନେକ ଲୋକ ଆହତ ହୋଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଥିବା ଦେଖିବାକୁ ମିଳିଛି। ଚିଲିପୋଖରୀ ଶିବ ନଗରରେ ଯୁବକଙ୍କୁ ମରଣାତ୍ମକ ଆକ୍ରମଣ ହୋଇଛି। ହୋଲିରେ ରଙ୍ଗ ଖେଳ ସାରି ଯୁବକମାନେ ସାଙ୍ଗ ହୋଇ ଭୋଜି ଖାଉଥିବା ବେଳେ ହଠାତ ୩ଜଣ ଆକ୍ରମଣ କରିଥିଲେ।କଟୁରୀ ଭଳି ମାରଣାସ୍ତ୍ରରେ ମୁଣ୍ଡକୁ ହାଣିବା ସହ ନିକଟ କେନାଲରେ ବୁଡେଇ ମାରିବାକୁ ଚେଷ୍ଟା କରିଥିଲେ। ଅଭିଯୁକ୍ତ ତପୁ, ସିପୁ, ଭିକିଙ୍କ ନାଁରେ ଏନେଇ ବଡଗଡ଼ ଥାନାରେ ଅଭିଯୋଗ ହୋଇଛି। ରକ୍ତାକ୍ତ ଅବସ୍ଥାରେ ଆହତ ଯୁବକଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରେ ୨ ଜଣ ଗୁରୁତର ଅଛନ୍ତି।
ଗଛରେ ପିଟିହେଲେ ୩ ଯୁବକ
ଯାଜପୁର ଜିଲ୍ଲା ବିଂଝାରପୁର ଥାନା କପିଳା ଛକ ନିକଟରେ ବାଇକ ଆରୋହୀମାନେ ଦୁର୍ଘଟଣାର ଶିକାର ହୋଇଥିଲେ। ହୋଲି ଖେଳି ସାଙ୍ଗମାନଙ୍କ ସହ ବାଇକ୍ରେ ଦ୍ରୁତଗତିରେ ଯାଉଥିଲା ବେଳେ ଗଛରେ ଧକ୍କା ହେବାରୁ ଜଣଙ୍କର ମୃତ୍ୟୁ ଘଟିଥିଲା। ଏହି ଦୁର୍ଘଟଣାରେ ଅନ୍ୟ ୨ ଜଣ ଯୁବକ ଆହତ ହୋଇଥିଲେ। ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ମୃତକ ହେଲେ ପ୍ରୀତିପୁର ଅଞ୍ଚଳର ଚନ୍ଦନ ଦାସ। ଆହତ ଦୁଇ ଜଣ ହେଲେ ଧନେଶ୍ଵର ବେହେରା ଓ ଦିବ୍ୟଜ୍ୟୋତି ମହାନ୍ତି। ଆହତ ଦ୍ୱୟଙ୍କୁ କଟକ ସ୍ଥାନାନ୍ତରିତ କରାଯାଉଛି।
ମହାନଦୀ ଓ ଲୁଣାରେ ବୁଡ଼ିଗଲେ ୩ ଯୁବକ
କଟକ ଜିଲ୍ଲାରେ ମହାନଦୀ ଓ ଲୁଣାନଦୀରେ ଗାଧୋଇବା ସମୟରେ ୩ ଜଣ ଯୁବକ ବୁଡ଼ି ଯାଇଛନ୍ତି। ଚୌହାନ ନିକଟ ନୂଆପାଟଣା ମଧୁସେତୁ ନିକଟରେ ଗାଧୋଇବା ବେଳେ ସଂଜୟ ପରିଡ଼ା ମାମରେ ଜଣେ ନିଖୋଜ ହୋଇଛନ୍ତି। ଏଠାରେ ଅନ୍ୟ ଜଣଙ୍କୁ ଉଦ୍ଧାର କରାଯାଇପାରିଛି। ରିପୋର୍ଟ ଲେଖାଯିବା ବେଳକୁ ନିଖୋଜ ବ୍ୟକ୍ତିଙ୍କର କୌଣସି ପତ୍ତା ମିଳିନାହିଁ। ସେହିପରି ନିଶ୍ଚିନ୍ତକୋଇଲି ବ୍ଲକ ଅନ୍ତର୍ଗତ ବୁହାଳ ଗାଁର ରାଜକୁମାର ସେନାପତି ଅନ୍ୟମାନଙ୍କ ସହିତ ନାଗାମଠ ନିକଟ ଦେଇ ପ୍ରବାହିତ ଲୁଣାନଦୀରେ ଗାଧୋଇବାକୁ ଯାଇଥିଲେ। କୌଣସି କାରଣରୁ ତାଙ୍କୁ ଜଳର ସ୍ରୋତ ଭସାଇ ନେଇଥିଲା। ଅନ୍ୟମାନେ ଅଗ୍ନିଶମ ବିଭାଗକୁ ନିଖୋଜ ଯୁବକ ସଂପର୍କରେ ସୂଚନା ଦେଇଥିଲେ। ବହୁ ଖୋଜାଖୋଜି ପରେ ରାଜକୁମାରଙ୍କ ମୃତଦେହ ଉଦ୍ଧାର ହୋଇଛି। କେନ୍ଦୁଝର ଜିଲ୍ଲା ଆନ୍ଦପୁର ଉପଖଣ୍ଡ ତରତରା ଗାଁରେ କେନାଲରେ ବୁଡ଼ି ଜଣେ ନାବାଳକ ଗୁରୁତର ହୋଇଛି।
ହୋଲି ଖେଳକୁ ନେଇ ବଲାଙ୍ଗୀର ଟାଉନ୍ ଥାନା ଅନ୍ତର୍ଗତ କନ୍ଧପାଲିପଡ଼ା ଗାଁରୁ ଏକ ଅଭାବନୀୟ ଖବର ରହିଛି। ପୋଖରୀରେ ବୁଡ଼ି ଜଣେ ଯୁବକଙ୍କର ମୃତ୍ୟୁ ଘଟିଛି। ସଂପୃକ୍ତ ଯୁବକ ହୋଲି ଖେଳି ସାରି ପୋଖରୀକୁ ଗାଧୋଇବାକୁ ଯାଇଥିଲେ। ସେ ପାଣିରେ ବୁଡ଼ି ଯାଇଥିଲେ। ଫଳରେ ତାଙ୍କର ମୃତ୍ୟୁ ଘଟିଥିଲା। ମୃତକଙ୍କ ପରିଚୟ ମିଳି ନାହିଁ। ବାଲେଶ୍ୱର ଜିଲ୍ଲା ସୋର ଅଣ୍ଡରା ଗାଁରେ ନାବାଳିକାର ମୃତ୍ୟୁ ହୋଇଛି ।
ଗୋଷ୍ଠୀ ସଂଘର୍ଷରେ ୧୨ ଆହତ
ଖୋର୍ଦ୍ଧା ଜିଲ୍ଲା ଭୂଷଣ୍ଡପୁର ଫାଣ୍ଡି ସରସ୍ଵତୀନଗର ଓ ପୁରୀ ଜିଲ୍ଲା ଗଡ଼ିସାଗଦା ଥାନା ଗଙ୍ଗାଧରପୁର ମଧ୍ୟରେ ଗାଧୋଇବାକୁ ନେଇ ଗୋଷ୍ଠୀ ସଂଘର୍ଷ ହୋଇଛି। ହୋଲି ଖେଳ ପରେ ପୋଖରୀରେ ଗାଧୋଇବାକୁ ନେଇ ଉଭୟ ଗ୍ରାମର ୧୦ରୁ ଅଧିକ ଆହତ ହୋଇଛନ୍ତି। ଘଟଣାସ୍ଥଳକୁ ପୁଲିସ ଯାଇ ଉତ୍ତେଜିତ ଲୋକଙ୍କୁ ବୁଝାସୁଝା କରିଛି। ଗଜପତି ଜିଲ୍ଲାରେ ହୋଲି ଅବସରରେ ନଗର ପରିକ୍ରମା ବେଳେ ଗଣ୍ଡଗୋଳ ହୋଇଚି। ସେରଙ୍ଗ ଥାନା ବଡ଼ପଦ ଗାଁରେ ୨ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଛି। ୨ ଜଣ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।
