ଭୁବନେଶ୍ୱର: ଖଣ୍ଡଗିରି କୁମ୍ଭମେଳାରେ ସାଧୁସନ୍ଥଙ୍କ ଭିଡ଼ ବଢ଼ିଛି। ସାଧୁଙ୍କ ଆଶୀର୍ବାଦ ନେବାକୁ ବିପୁଳ ଜନ ସମାଗମ ମଧ୍ୟ ହେଉଛି। ତେବେ ବହୁ ପ୍ରତୀକ୍ଷିତ ଖଣ୍ଡଗିରି ଯାତ୍ରା ଆସନ୍ତା ୫ ତାରିଖରୁ ଆରମ୍ଭ ହେବ। ଖଣ୍ଡଗିରି ଯାତ୍ରା ମହାକୁମ୍ଭରେ ପ୍ରଥମ ପାଦ ରଖିବେ ଦୁଇ ହେଭି ୱେଟ୍ କୋଣାର୍କ ଗଣନାଟ୍ୟ ଓ କଳିଙ୍ଗ ଗଣନାଟ୍ୟ। ସନାତନ ସେବା ସମିତି ପକ୍ଷରୁ ଘାଟିକିଆ ପଡ଼ିଆରେ କୋଣାର୍କ ଗଣନାଟ୍ୟ ନାଟକ ‘ଆଖି ଅବୁଝାକୁ ଲୁହ ଅବୁଝା’ ନାଟକ ନେଇ ମଇଦାନକୁ ଓହ୍ଲାଇବ। ଯାତ୍ରା ଟାଇଗର ଦୈତାରୀ ପଣ୍ଡାଙ୍କ ସମେତ ରୁଦ୍ର, ଜିତୁ, ନଳିନୀ, ପୂଜା ଓ ମିଟୁନାଙ୍କ ଭଳି କଳାକାରଙ୍କ ଅଭିନୟ ଦର୍ଶକ ଦେଖିବାକୁ ପାଇବେ। ଇନ୍ଦିରା ସାଂସ୍କୃତିକ ପରିଷଦ ପକ୍ଷରୁ କଳିଙ୍ଗ ପେଣ୍ଡାଲ୍ ପଡ଼ିଆରେ ‘କଳିଙ୍ଗ ଗଣନାଟ୍ୟ’ ତା’ର ନାଟକ ‘ଶ୍ରାବଣ ମାସର ଶେଷ ରାତି’ ନେଇ ପ୍ରବେଶ କରିବ। ତେବେ ଆସନ୍ତା ୬ ତାରିଖରୁ ଆଉ ୨ଟି ପାର୍ଟି ମଇଦାନକୁ ଓହ୍ଲାଇବେ। ମହତାବ ପେଣ୍ଡାଲ୍କୁ ‘ଯାତ୍ରା ମାୟାନଗରୀ’ ଆସୁଥିବା ବେଳେ ଜାଗମରା କେସିଏ ପଡ଼ିଆକୁ ‘ସ୍ୱପ୍ନ ମହଲ’ ଆସିବ। ଆସନ୍ତା ୧୦ରୁ ଆଉ ୨ ପାର୍ଟି ଯାତ୍ରା ମହୋତ୍ସବରେ ସାମିଲ ହେବେ। ଜାଗମରା ମେଳଣ ପଡ଼ିଆକୁ ‘ରାଜଧାନୀ ଅପେରା’ ‘ଲକ୍ଷେ ଶିବ ପୂଜି ପାଇଛି ତତେ’ ନାଟକ ନେଇ ଆସୁଥିବା ବେଳେ କେସିଏ ପଡ଼ିଆ (୨)କୁ ‘ମାୟାବିନୀ ମୌସୁମୀ’ ନାଟକ ନେଇ ଆସିବ ଅପେରା ‘ସୂର୍ଯ୍ୟମନ୍ଦିର’।
