ମୁମ୍ବାଇ: ଏସପି ବାଲସୁବ୍ରମଣ୍ୟମ, ଭାରତୀୟ ସଂଗୀତ ଜଗତର ଏମିତି ଏକ ସ୍ପର୍ଦ୍ଧିତ ନାମ ଯାହାଙ୍କ ସ୍ୱର ଭାରତୀୟ ସିନେମା ଜଗତରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଥିଲା। ୧୬ ଟି ଭାରତୀୟ ଭାଷାରେ ପ୍ରାୟ ୪୦ ହଜାରରୁ ଅଧିକ ଗୀତ ଗାଇଥିବା ବାଲସୁବ୍ରମଣ୍ୟମ ଆଜି ୭୪ ବର୍ଷରେ ପାଦ ଦେଇଛନ୍ତି। ସେ ପଦ୍ମଶ୍ରୀ ଏବଂ ପଦ୍ମଭୂଷଣ ସହିତ ଅନେକ ପୁରସ୍କାର ପାଇଥିବାବେଳେ ତାଙ୍କ ଗୀତକୁ ଏବେ ବି ସବୁ ପିଢ଼ିର ଶ୍ରୋତା ଗୁଣୁଗୁଣେଇହେଉଛନ୍ତି। ଓଡ଼ିଆ ଭାଷାରେ ମଧ୍ୟ ସେ କଣ୍ଠଦାନ କରିଥିଲେ। ଫିଲ୍ମ ସତ କେବେ ଲୁଚି ରହେନା ରେ ସେ କଣ୍ଠଦାନ କରିଥିଲେ। ଏସପି ବାଲାସୁବ୍ରମଣ୍ୟମ୍, ଏସପିବି ଭାବରେ ବେଶ ଜଣାଶୁଣା। ଆନ୍ଧ୍ରପ୍ରଦେଶର ନେଲୋରରେ ୪ ଜୁନ୍, ୧୯୪୬ ରେ ସେ ଜନ୍ମଗ୍ରହଣ କରିଥିଲେ। ସେ ଜଣେ ସଙ୍ଗୀତ ନିର୍ଦ୍ଦେଶକ, ଅଭିନେତା, ଡବିଂ କଳାକାର ତଥା ଚଳଚ୍ଚିତ୍ର ନିର୍ମାତା ମଧ୍ୟ ଅଟନ୍ତି। ୧୯୬୬ ମସିହାରେ ଏକ ତେଲୁଗୁ ଗୀତରୁ ନିଜ କ୍ୟାରିୟର ଆରମ୍ଭ କରିଥିଲେ ଏବଂ ପରେ କନ୍ନଡ ଏବଂ ତାମିଲ ଚଳଚ୍ଚିତ୍ର ଶିଳ୍ପରେ ଡେବ୍ୟୁ କରିଥିଲେ। ୧୯୬୯ ରେ ବାଲସୁବ୍ରମଣ୍ୟମଙ୍କ ସ୍ୱତନ୍ତ୍ର ଅଧ୍ୟାୟ ଆରମ୍ଭ ହୋଇଥିଲା, ଯେତେବେଳେ ଭେଟେରାନ ତାମିଲ ଅଭିନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଏମ.ଜି ରାମଚନ୍ଦ୍ରନ ଚାହୁଁଥିଲେ ଯେ ସେ ତାଙ୍କ ଚଳଚ୍ଚିତ୍ର ‘ଆଡିମାଇପେନ’ରେ ଗୀତ ଗାଆନ୍ତୁ। ଏସପିବି ସେତେବେଳେ ଜଣାଶୁଣା ଚେହେରା ନଥିବାବେଳେ ଏହି ଫିଲ୍ମର ଗୀତ ‘ଆୟିରାମ ନୀଲାଭ ଭା’ ତାଙ୍କୁ ପ୍ରସିଦ୍ଧି ଆଣିଦେଇଥିଲା ଓ ଏହି ଗୀତ ପାଇଁ ଚଳଚ୍ଚିତ୍ରଟି ଏକ ବଡ଼ ହିଟ୍ ହୋଇଥିଲା। ଗୋଟିଏ ଦିନରେ ସର୍ବାଧିକ ସଂଖ୍ୟକ ଗୀତ ଗାଇବାର ରେକର୍ଡ ତାଙ୍କ ନାମରେ ରହିଛି। ସେ ୮ ଫେବୃଆରୀ ୧୯୮୧ରେ ଉପେନ୍ଦ୍ର କୁମାର ସଂଗୀତ ନିର୍ଦ୍ଦେଶନାରେ କନ୍ନଡ ଭାଷାରେ ୨୧ ଟି ଗୀତ ରେକର୍ଡ କରିଥିଲେ। ୧୯୮୧ ମସିହାରେ ସେ ‘ଏକ ଦୁଜେ କେ ଲିୟେ’ ଚଳଚ୍ଚିତ୍ରରେ ବଲିଉଡରେ ଡେବ୍ୟୁ କରିଥିଲେ ଏବଂ ‘ତେରେ ମେରେ ବିଚ ମେଁ ‘ ଗୀତ ପାଇଁ ସେ ଦ୍ୱିତୀୟ ଜାତୀୟ ପୁରସ୍କାର ଗ୍ରହଣ କରିଥିଲେ। ପରେ ସେ ଦୁଇଟି ତେଲୁଗୁ ଗୀତ ଏବଂ ଗୋଟିଏ ତାମିଲ ଏବଂ କନ୍ନଡ ଗୀତ ପାଇଁ ଆଉ ଦୁଇଟି ଜାତୀୟ ପୁରସ୍କାର ଜିତିଥିଲେ।
