ଭୁବନେଶ୍ବର : ରାଜ୍ୟସଭା ଉପସଭାପତି ନିର୍ବାଚନ ପୂର୍ବରୁ ଓଡ଼ିଶା ମୁଖମନ୍ତ୍ରୀ ମୁଖ୍ୟ ତଥା ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କ ସମର୍ଥନ ଲୋଡ଼ିଛନ୍ତି ବିହାର ମୁଖମନ୍ତ୍ରୀ ତଥା ଜେଡିୟୁ ସୁପ୍ରିମୋ ନିତିଶ କୁମାର। ଆଜି ନିତିଶ ଫୋନ କରି ନବୀନଙ୍କ ସହ ଆଲୋଚନା କରିବା ସହ ସମର୍ଥନ ମାଗିଛନ୍ତି। ରାଜ୍ୟସଭା ଉପସଭାପତି ନିର୍ବାଚନରେ ଏନଡିଏ ତରଫରୁ ଜେଡିୟୁ ପ୍ରାର୍ଥୀ ହରିବଂଶ ନାରାୟଣ ସିଂ ପ୍ରାର୍ଥୀ ହେଉଥିବାବେଳେ ତାଙ୍କର ବିଜୟ ପାଇଁ ବିଜେଡ଼ିର ସମର୍ଥନ ଗୁରୁତ୍ବପୂର୍ଣ୍ଣ ରହିଛି। ଗତ ରାଜ୍ୟସଭା ନିର୍ବାଚନରେ ବିଜେଡ଼ି ଏନଡିଏ ପ୍ରାର୍ଥୀ ହରିବଂଶଙ୍କୁ ସମର୍ଥନ କରିଥିଲା। ଗତକାଲି ହରିବଂଶ ରାଜ୍ୟସଭା ଉପସଭାପତି ପଦ ପାଇଁ ଏନଡିଏ ପ୍ରାର୍ଥୀଭାବେ ମନୋନୟନ ପତ୍ର ଦାଖଲ କରିଥିଲେ। ଶ୍ରୀ ହରିବଂଶ ଗତ ୨୦୧୮ରୁ ଗତ ଏପ୍ରିଲ ପର୍ଯନ୍ତ ରାଜ୍ୟସଭା ଉପସଭାପତି ଥିଲେ। କିନ୍ତୁ ଏପ୍ରିଲରେ ତାଙ୍କର ରାଜ୍ୟସଭା ସଦସ୍ୟ ଅବଧି ଶେଷ ହେବା ପରେ ତାଙ୍କୁ ପୁଣି ଥରେ ଜେଡିୟୁ ରାଜ୍ୟସଭାକୁ ପଠାଇଥିଲା। ଏନଡିଏ ପ୍ରାର୍ଥୀଭାବେ ସେ ରାଜ୍ୟସଭା ଉପସଭାପତି ନିର୍ବାଚିତ ହେବା ଏକରକମ ନିଶ୍ଚିତ ବୋଲି କୁହାଯାଉଛି। ୟୁପିଏ ପକ୍ଷରୁ ଡିଏମକେ ସଦସ୍ୟ ତିରୁଚି ଶିବଙ୍କୁ ପ୍ରାର୍ଥୀ କରାଯିବାର ସମ୍ଭାବନା ରହିଛି। ରାଜ୍ୟସଭାରେ ବିଜେପିର ସର୍ବାଧିକ ୮୭ ସଦସ୍ୟ ଥିବାବେଳେ ବିଜେଡିର ୯ ସଦସ୍ୟ ଅଛନ୍ତି।
