ମାଲକାନଗିରି : ମାଲକାନଗିରି ଉପକାରାଗାରରେ ଜଣେ ବିଚାରଧୀନ ନକ୍ସଲର ମୃତ୍ୟୁକୁ ନେଇ ଉଠିଛି ପ୍ରଶ୍ନ। ବିଚାରଧୀନ ନକ୍ସଲ କଏଦୀ ନିଜେ ଆତ୍ମହତ୍ୟା କରିଛନ୍ତି ନା ତାଙ୍କୁ ହତ୍ୟା କରାଯାଇଛି ତାହା ସନ୍ଦେହ ଘେରରେ ରହିଛି। ଗତ ଦୁଇ ମାସ ତଳେ ନକ୍ସଲ କେଶରେ ମୃତ ଦନୁ ଗୋଲାରୀଙ୍କୁ ଗିରଫ କରି ଜେଲ ପଠାଇଥିଲେ। ସେ ସ୍ୱାଭିମାନ ଅଞ୍ଚଳର ଖଜୁରୀଗୁଡା ଗ୍ରାମର ସୁରେନ୍ଦ୍ର ଗୋଲାରୀଙ୍କ ପୁଅ ବୋଲି ଜଣାପଡିଛି। ମୃତ ଦନୁ ଗୋଲାରୀଙ୍କ ବେକକୁ ଏକ ଧାରୁଆ ଅସ୍ତ୍ରରେ କଟାଯାଇଛି। ତାଙ୍କ ବେକରେ ଗଭୀର କ୍ଷତ ସୃଷ୍ଟି ହୋଇଛି।ମାଲକାନଗିରି ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଯାଇଛି। ତେବେ ଗତ ଏକମାସ ମଧ୍ୟରେ ଅନ୍ୟ ଦୁଇଜଣ ବିଚାରାଧୀନ କଏଦୀଙ୍କ ସମେତ ତିନିଜଣଙ୍କର ମୃତ୍ୟୁ ହୋଇସାରିଲାଣି। ଜେଲରଙ୍କର ଖାମଖିଆଲ ମନୋଭାବ ଓ ପରିଚାଳନା ଗତ ଅନଭିଜ୍ଞତା ଯୋଗୁଁ ଏଭଳି ଘଟଣା ଘଟୁଥିବା ଅଭିଯୋଗ ହୋଇଛି। ତେବେ ପରିବାର ଲୋକଙ୍କୁ ଗତକାଲି ନ ଜଣାଇ ମୃତ୍ୟୁର ପରଦିନ ଖବର ଦେଇଥିବାରୁ ଉତ୍ତେଜନା ଦେଖାଦେଇଛି। ତୁରନ୍ତ ଜେଲରଙ୍କୁ ହଟାଇବା ନେଇ ଦାବି ହେଉଛି।
