ମାଲକାନଗିରି: ଦକ୍ଷତା ବିକାଶର ମୁଖ୍ୟ ସୁବ୍ରତ ବାଗ୍ଚୀ ଏବଂ କୃଷି ସଚିବ ସୌରଭ ଗର୍ଗ ଆଜି ମାଲକାନଗିରି ଗସ୍ତରେ ଆସି ପ୍ରଥମେ ଚିତ୍ରକୋଣ୍ଡା ଯାଇଥିଲେ। ସେଠାରେ କୃଷି ଉଦ୍ୟାନ ବିଭାଗର ଜୈବ ପରିବେଶ ଏବଂ ଏଠାରେ କିପରି ବିଭିନ୍ନ କୃଷି ଜାତ ଦ୍ରବ୍ୟକୁ ନେଇ ଜାତୀୟ ସ୍ତରରେ ଉପସ୍ଥାପନ କରାଯାଇପାରିବ ଏବଂ ବିଶେଷକରି ମିଲେଟ ମିଶନକୁ ଆଗ୍ରାଧିକାର ଦିଆଯିବ ସେନେଇ ଏକ ରୂପରେଖ ପ୍ରସ୍ତୁତ କରିଥିଲେ। ସେହିପରି ପରେ ଆଇଟିଆଇ କେନ୍ଦ୍ର ପରିଦର୍ଶନ କରି ଏଠାରେ ଚାଲୁଥିବା କାର୍ଯ୍ୟକୁ ଭୃୟସୀ ପ୍ରଶଂସା କରିଥିଲେ।
ଶ୍ରୀ ବାଗଚୀ ଯେତେବେ ୨୦୧୬ ମସିହାରେ ମାଲକାନଗିରି ଗସ୍ତ କରି ଦକ୍ଷତା ବିକାଶ କେନ୍ଦ୍ର ପରିଦର୍ଶନ କରିଥିଲେ, ସେତେବେଳେ ଏହା ଜରାଜୀର୍ଣ୍ଣ ଅବସ୍ଥାରେ ରହିଥିଲା ବୋଲି କହିଥିଲେ। ଆସନ୍ତା ୫ ବର୍ଷ ମଧ୍ୟରେ ଦକ୍ଷତା ବିକାଶ କେନ୍ଦ୍ର ଦ୍ବାରା କୃଷିକୁ ଆପଣାର କରିପାରିବା ତଥା କୃଷି ଓ ଦକ୍ଷତାକୁ ଏକାକିକରଣ କରାଯାଇ ପାରିବ ସେନେଇ ଜିଲ୍ଲା ପ୍ରଶାସନ ସହ ବିଚାରମିମର୍ଷ ଚାଲିଛି। ମିଲେଟ ମିଶନକୁ ନେଇ ଏକ ସମନ୍ବୟ ବିକାଶ ହେବ ସେନେଇ କାର୍ଯ୍ୟ କରାଯିବ ବୋଲି ଶ୍ରୀ ବାଗ୍ଚୀ କହିଥିଲେ। ମାଲକାନଗିରି ଆଗାମୀ ଦିନରେ ଏକ ଆଗୁଆ ଅଞ୍ଚଳ ହୋଇ ବାହାରିବ ଏବଂ ଦେଶରେ ନାମ କରି ତାହା ଆମ ପାଇଁ ଗର୍ବ ଓ ଗୌରବର ବିଷୟ ବୋଲି କୁହାଯାଇଥିଲା। ଏହି କାର୍ଯ୍ୟକ୍ରମରେ ଜିଲ୍ଲାପାଳ ୱାଇ.ବିଜୟ, ପିଡି.ଡିଆରଡିଏ ବାଳମୁକୁନ୍ଦ ଭୁୟାଁ ପ୍ରମୁଖ ଉପସ୍ଥିତ ଥିଲେ।
