ନୂଆଦିଲ୍ଲୀ : ତାଲିବାନ ଖୁବଶୀଘ୍ର ଆଫଗାନିସ୍ତାନରୁ କ୍ଷମତାଚ୍ୟୁତ ହେବାର ସମ୍ଭାବନା ରହିଛି ! ଏପରି ଭବିଷ୍ୟତବାଣୀ କରିଛନ୍ତି ଋଷିଆର ଜଣେ ବରିଷ୍ଠ କୂଟନୀତିଜ୍ଞ। ଆଫଗାନିସ୍ତାନରେ ଅବସ୍ଥାପିତ ଋଷୀୟ ରାଷ୍ଟ୍ରଦୂତ ଜାମିର କାବୁଲୋଭ କହିଛନ୍ତି ଯେ ତାଲିବାନକୁ ସମସ୍ତଙ୍କୁ ସାଙ୍ଗରେ ନେଇ ଚାଲିବାକୁ ପଡ଼ିବ। ତାଲିବାନକୁ ଏକ ସମାବେଶୀ ସରକାର, ଯେଉଁଥିରେ ସବୁ ପକ୍ଷଙ୍କ ପ୍ରତିନିଧିତ୍ବ ଥିବ, ଗଢିବାକୁ ପଡ଼ିବ। ଏପରି ନକଲେ ତାଲିବାନ ଖୁବଶୀଘ୍ର କ୍ଷମତା ହରାଇବ। କାରଣ ଏହା ଗୃହଯୁଦ୍ଧ ଆଡ଼଼କୁ ଟାଣିନେବ। ସେ ଆହୁରି ମଧ୍ୟ କହିଛନ୍ତି ଯେ ପାଶ୍ଚାତ୍ୟ ଦେଶରେ ଅଚଳ କରାଯାଇଥିବା ଆଫଗାନିସ୍ତାନର ପାଣ୍ଠିକୁ ସଚଳ କରାଯିବ ଯଦି ତାଲିବାନ ନିଜର ଆଚରଣରେ ସଂଶୋଧନ କରେ। ତାଲିବାନ ଜାଣିବା ଉଚିତ ଯେ ବିଭିନ୍ନ ବହୁରାଷ୍ଟ୍ରୀୟ ସଂସ୍ଥାରେ ଥିବା ଆଫଗାନିସ୍ତାନର ପାଣ୍ଠି ତାଲିବାନର ସମ୍ପତ୍ତି ନୁହେଁ, ଏହି ସମ୍ପତ୍ତି ଆଫଗାନିସ୍ତାନବାସୀଙ୍କର। ସେମାନଙ୍କ ସମସ୍ୟା ସମାଧାନରେ ତାହାର ଉପଯୋଗ ହେବା ଉଚିତ। ତେବେ ଆଫଗାନିସ୍ତାନରେ ଦେଖାଦେଇଥିବା ମାନବୀୟ ସଂକଟ ପାଇଁ ପାଶ୍ଚାତ୍ୟ ଦେଶ ବି ଦାୟୀ ବୋଲି ସେ କହିଛନ୍ତି। ସୂଚନାଯୋଗ୍ୟ ଯେ, ଅନ୍ତର୍ଜାତୀୟ ସମୁଦାୟର ନିବେଦନ ସତ୍ତ୍ବେ ତାଲିବାନ ପକ୍ଷରୁ ଗତ ସେପ୍ଟେମ୍ବର ମାସରେ ଗଠିତ ଅନ୍ତରୀଣ ସରକାରରେ କେବଳ ତାଲିବାନ ଓ ହକ୍କାନି ନେଟଓ୍ବାର୍କର ଲୋକମାନଙ୍କୁ ଅନ୍ତର୍ଭୁକ୍ତ କରାଯାଇଥିଲା। ସଂଖ୍ୟାଲଘୁ ଲୋକମାନଙ୍କୁ ଏଥିରେ ସ୍ଥାନ ଦିଆଯାଇନଥିଲା। ଏହା ପରେ ଅଧିକାଂଶ ଦେଶ ତାଲିବାନ ସରକାରକୁ ଏପର୍ଯ୍ୟନ୍ତ ସ୍ବୀକୃତି ଦେଇନାହାନ୍ତି।
ସମାବେଶୀ ସରକାର ନ ଗଢିଲେ ଆଫଗାନିସ୍ତାନରେ କ୍ଷମତା ହରାଇବ ତାଲିବାନ : ଋଷ କୂଟନୀତିଜ୍ଞ
Share Now: