ଭୁବନେଶ୍ୱର: କରୋନା ରାଜଧାନୀ ପିଛା ଛାଡ଼ୁନି। ଗତ ମାସ ୧୪ ତାରିଖ ପରେ ରାଜଧାନୀରେ କେହି କରୋନା ସଂକ୍ରମିତ ଚିହ୍ନଟ ହୋଇ ନ ଥିଲେ। ମାତ୍ର ୨୮ ତାରିଖରେ ମଧୁସୂଦନ ନଗରର ଜଣେ ବୃଦ୍ଧ ଚିହ୍ନଟ ହେବା ଓ ପରେ ପ୍ରାଣ ହରାଇବା ପୁଣିଥରେ ରାଜଧାନୀବାସୀଙ୍କ ଡର ବଢ଼ାଇ ଦେଇଥିଲା। ଏହାର ୯ଦିନ ପରେ ପୁଣି ରାଜଧାନୀରେ ୩ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। କେନ୍ଦ୍ର ସରକାରଙ୍କ ନିର୍ଦ୍ଦେଶାବଳୀ ଅନୁଯାୟୀ, ୨୧ ଦିନ ଭିତରେ କରୋନା ପଜିଟିଭ୍ ଚିହ୍ନଟ ହେଲେ, ସଂପୃକ୍ତ ମ୍ୟୁନିସିପାଲଟିକୁ ଜିଲ୍ଲାରୁ ପୃଥକ୍ କରାଯାଇ ରେଡ୍ ଜୋନ୍ ଭାବେ ଘୋଷଣା କରାଯାଇ ପାରିବ। ଏ ଦୃଷ୍ଟିରୁ ସ୍ୱାସ୍ଥ୍ୟ ବିଭାଗ ଗତ ୪ତାରିଖରୁ ଭୁବନେଶ୍ୱରକୁ ରେଡ୍ ଜୋନ୍ ବୋଲି ଘୋଷଣା କରିଛି। ରେଡ୍ ଜୋନ୍ରେ କେତେକ କଟକଣା ରହିଛି। ମାତ୍ର ରାଜଧାନୀବାସୀ ଏହାକୁ ଖାତିର୍ କରୁନାହାନ୍ତି। ନିୟମିତ ବ୍ୟବଧାନରେ କରୋନା ସଂକ୍ରମିଚ ଚିହ୍ନଟ ହେଉଥିଲେ ହେଁ ଲୋକମାନଙ୍କ ଉପରେ ଏହାର ପ୍ରଭାବ ପଡ଼ୁନାହିଁ। ସାମାଜିକ ଦୂରତ୍ୱକୁ ଦଳିମକଚି ପରିବା ଦୋକାନଠାରୁ ଗ୍ରୋସେରି ଦୋକାନରେ ଗହଳି କରୁଥିବା ଦେଖିବାକୁ ମିଳୁଛି। ମାଛ ଦୋକାନୀଙ୍କ ପାଖରେ ସବୁଠାରୁ ଅଧିକ ଗହଳି ହେଉଛି। ମାତ୍ର ସାମାଜିକ ଦୂରତ୍ୱକୁ ସମସ୍ତେ ଯେପରି ଅଣଦେଖା କରୁଛନ୍ତି ,ଯଦି ସଜାଗ ନ ହେବେ ତାହାର ପରିଣାମ ରାଜଧାନୀବାସୀ ନିଶ୍ଚୟ ଭୋଗ କରିବେ।
