ନୂଆଦିଲ୍ଲୀ: ପ୍ରଧାନମନ୍ତ୍ରୀ ହେବା ପୂର୍ବରୁ ୨୦୧୪ ସାଧାରଣ ନିର୍ବାଚନରେ ଅନେକ ପ୍ରତିଶ୍ରୁତି ଦେଇ ଶାସନ କ୍ଷମତାକୁ ଆସିଥିଲେ ନରେନ୍ଦ୍ର ମୋଦି। ସେହି ସମୟରେ ମୋଦି କହିଥିଲେ ଯେ, ବିଦେଶରେ ସୁଇସ୍ ବ୍ୟାଙ୍କରେ ଥିବା କଳା ଧନ ଫେରିବ। ଆଉ ପ୍ରତି ଭାରତୀୟଙ୍କ ଆକାଉଣ୍ଟରେ ୧୫ ଲକ୍ଷ ଟଙ୍କା ଲେଖାଁଏ ଟଙ୍କା ଜମା ହେବ। ହେଲେ ଏଯାଏଁ କୌଣସି ପଦକ୍ଷେପ ନିଆଯାଇ ନ ଥିବାରୁ ଏନେଇ ଜଣେ ଆବେଦନକାରୀ ୧୫ ଲକ୍ଷ ଟଙ୍କା କେବେ ମିଳିବ ବୋଲି ଆରଟିଆଇରେ ତଥ୍ୟ ମାଗିବାରୁ ତାଙ୍କ ଦରଖାସ୍ତକୁ ଖାରଜ କରିଦିଆଯାଇଛି। ଆର୍ଟି ଆଇନ ଅନୁଯାୟୀ ଆବେଦନ କରାଯାଇଥିବା ଦରଖାସ୍ତ କୌଣସି ମାନଦଣ୍ଡ ପୂରଣ କରୁ ନାହିଁ ବୋଲି ଉତ୍ତରରେ ଦର୍ଶାଯାଇଛି। ଆବେଦନକାରୀ ଏ ସମ୍ପର୍କରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ(ପିଏମଓ)ରେ ଆବେଦନ କରିଥିଲେ। ଦରଖାସ୍ତରେ କେଉଁ ନିର୍ଦ୍ଦିଷ୍ଟ ତାରିଖରେ ୧୫ ଲକ୍ଷ ଟଙ୍କା ମିଳିବ ବୋଲି ଆବେଦନକାରୀ ପ୍ରଶ୍ନ କରିଥିଲେ।
ଜବାବରେ ପିଏମଓ କହିଥିଲା ଯେ, ଆରଟିଆଇ ଆଇନ୍ ଅନୁଯାୟୀ ଥିବା ବିଧି ବ୍ୟବସ୍ଥାରେ ଏହି ଦରଖାସ୍ତକୁ ଗ୍ରହଣ କରିହେବ ନାହିଁ। ୨୦୧୬ ନଭେମ୍ବର ୨୬ରେ ଏଭଳି ଆବେଦନ କରାଯାଇଥିଲା। ଏନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ କିମ୍ବା ଆରବିଆଇ ପକ୍ଷରୁ କୌଣସି ଉତ୍ତର ଦେଇ ହେବ ନାହିଁ ବୋଲି କୁହାଯାଇଛି।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ମୁଖ୍ୟ ଲୋକ ସମ୍ପର୍କ କମିଶନର ଆରକେ ମାଥୁର କହିଛନ୍ତି ଯେ, Section 2(f) of the RTI Act, ଅଧୀନରେ ଥିବା ନିୟମାବଳୀ ଅନୁଯାୟୀ ଏହି ଆବେଦନ ଆଦୌ ଗ୍ରହଣଯୋଗ୍ୟ ନୁହଁ। ସୂଚନାଯୋଗ୍ୟ ମୋଦିଙ୍କ ଉପରୋକ୍ତ ନିର୍ବାଚନ ପ୍ରତିଶ୍ରୁତିକୁ ନେଇ ବିଭିନ୍ନ ରାଜନୈତିକ ଦଳ ପକ୍ଷରୁ ତୀବ୍ର ସମାଲୋଚନା କରାଯାଇଥିଲା। ଏମିତିକି କଂଗ୍ରେସ ଓ ଆରଜେଡି ପକ୍ଷରୁ ମୋଦିଙ୍କ ପ୍ରତିଶ୍ରୁତିକୁ ନେଇ ପ୍ରଶ୍ନ କରିଥିଲେ। କହିଥିଲେ ପ୍ରତିଜ୍ଞା କରିଥିଲ। ହେଲେ ଟଙ୍କା କାହିଁକି ମିଳୁନାହିଁ ।