ପୁରୀ: ପୁରୀରେ ‘ଆନ୍ତର୍ଜାତିକ ଶ୍ରୀଜଗନ୍ନାଥ ପ୍ରତିଷ୍ଠାନ’ର ପ୍ରଥମ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ବରିଷ୍ଠ ସମାଜସେବୀ ଦିଲ୍ଲୀପ ପଟ୍ଟନାୟକ ଅଧ୍ୟକ୍ଷତା କରିଥିଲେ। ୟୁକେ, ଆମେରିକା, ଆଫ୍ରିକା, ମୁମ୍ବାଇ, ଛତିଶଗଡ଼ ଓ ଓଡ଼ିଶାର ବହୁ ବିଶିଷ୍ଟ ବ୍ୟକ୍ତି ବୃନ୍ଦ ଏହି ବୈଠକରେ ଯୋଗଦାନ କରିଥିଲେ। ବୈଠକରେ ପୁରୀଠାରେ ଶ୍ରୀଜଗନ୍ନାଥ ଚେତନା ଭିତ୍ତିକ ଏକ ସଂଗ୍ରହାଳୟ ଓ କେନ୍ଦ୍ରୀୟ ପାଠାଗାର ସ୍ଥାପନ ହେବ ବୋଲି ପ୍ରତିଷ୍ଠାନର ମହାନିର୍ଦ୍ଦେଶକ ଡକ୍ଟର ଭାସ୍କର ମିଶ୍ର ସୂଚନା ଦେଇଥିଲେ।
ଏହି କାର୍ଯ୍ୟକ୍ରମରେ ଉପଦେଷ୍ଟା ଓ ନିର୍ଦ୍ଦେଶକ ଭାବେ ବରିଷ୍ଠ ସାମ୍ବାଦିକ ଚାରୁ କଲ୍ୟାଣ ମହାପାତ୍ର, କୁଳାଧିପତି ପ୍ରଫେସର ପ୍ରଫୁଲ୍ଲ କୁମାର ମିଶ୍ର, ଡଃ ହର ପ୍ରସନ୍ନ ଦାସ, ଡଃ ଭଗବାନ ପଣ୍ଡା, ଡଃ ପଂଚାନନ ଶତପଥୀ, ରମେଶ ବିଶ୍ବାଳ, ଦଇତାପତି ରାମଚନ୍ଦ୍ର ଦାସ ମହାପାତ୍ର, ଡଃ ଜଗବନ୍ଧୁ ମିଶ୍ର, ପ୍ରାଧ୍ୟାପକ ସୁନୀଲ ରଥ, ବରିଷ୍ଠ ସେବାୟତ ବିଶ୍ବନାଥ ସାମନ୍ତରା, ନାଇଜେରିଆର ସଂଗ୍ରାମ ପଟ୍ଟନାୟକ ଓ ଅନ୍ୟ ବ୍ୟକ୍ତି ବିଶେଷମାନେ ଯୋଗଦେଇଥିଲେ।
