“ଟ୍ରେନ କେଉଁଠି ରହିବ ତାହା କଣ ସୁପ୍ରିମକୋର୍ଟ ସ୍ଥିର କରିବେ ?”
ନୂଆଦିଲ୍ଲୀ : ବେଳେବେଳେ ଏଭଳି ଅଜବ ମାମଲା ଅଦାଲତକୁ ତାହା ଜାଣିଲେ ଆପଣ ବି ଆଶ୍ଚର୍ଯ୍ୟ ହେବେ। ଅଦାଲତରେ ଲକ୍ଷଲକ୍ଷ ମାମଲା ବିଚାରାଧୀନ ଥିବା ବେଳେ ଏହି ଅଜବ ମାମଲାକୁ ନେଇ ବିଚାରପତିମାନେ ଅସନ୍ତୋଷ ବ୍ୟକ୍ତ କରିବା ସ୍ୱାଭାବିକ। ନିକଟରେ କେରଳର ଜଣେ ଓକିଲଙ୍କ ଏଭଳି ଏକ ମାମଲା ସାମ୍ନାକୁ ଆସିଥିଲା, ଯାହାର ଶୁଣାଣି ସମୟରେ ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡ଼ ଆବେଦନକାରୀଙ୍କ ଉପରେ ରାଗି ଯାଇ କହିଥିଲେ, ଆପଣ ଅଦାଲତକୁ ଡାକଘର ବୋଲି ଭାବିଛନ୍ତି କି ?
ସୁପ୍ରିମକୋର୍ଟର ପ୍ରଧାନ ବିଚାରପତି ଚନ୍ଦ୍ରଚୂଡ଼, ଜଷ୍ଟିସ ପିଏସ୍ ନରସିଂହ ଏବଂ ଜଷ୍ଟିସ ମନୋଜ ମିଶ୍ର କେରଳର ଜଣେ ଓକିଲଙ୍କ ଆବେଦନର ଶୁଣାଣି କରୁଥିଲେ। ଓକିଲ ଚାହୁଁଥିଲେ ଯେ କୋର୍ଟ ବନ୍ଦେ ଭାରତ ଟ୍ରେନ୍ ଯେପରି ତାଙ୍କ ନିଜ ଜିଲ୍ଲାରେ ମଧ୍ୟ ଅଟକିବ ସେଥିପାଇଁ ନିର୍ଦ୍ଦେଶ ଦିଅନ୍ତୁ। ଆପଣ ଚାହୁଁଛନ୍ତି ଯେ ବନ୍ଦେ ଭାରତ କେଉଁଠାରେ ଅଟକିବ ତାହା ଆମେ ସ୍ଥିର କରୁ। ଏହାପରେ ରାଜଧାନୀ ଏକ୍ସପ୍ରେସ କେଉଁଠି ରହିବ ସେ ଦିଗରେ ବି କାମ କରିବାକୁ ପଡ଼ିବ, ନୁହେଁ ? ଏହା ନୀତି ସହ ଜଡ଼ିତ ବିଷୟ, ଆପଣ (ରେଳ) କର୍ତ୍ତୃପକ୍ଷଙ୍କ ନିକଟକୁ ଯାଆନ୍ତୁ।