୩ଟି ପର୍ଯ୍ୟାୟରେ ଅକ୍ଟୋବର ୨୮, ନଭେମ୍ବର ୩ ଓ ୭ରେ ହେବ ନିର୍ବାଚନ
ନୂଆଦିଲ୍ଲୀ: ବିହାର ବିଧାନସଭା ନିର୍ବାଚନ ପାଇଁ ଆଜି ନିର୍ବାଚନ କମିଶନ ପକ୍ଷରୁ ତାରିଖ ଘୋଷଣା କରାଯାଇଛି। ବିହାରରେ ୩ଟି ପର୍ଯ୍ୟାୟରେ ନିର୍ବାଚନ ହେବ। ଅକ୍ଟୋବର ୨୮, ନଭେମ୍ବର ୩ ଓ ୭ ତାରିଖରେ ମତଦାତା ମତଦାନ କରିବେ। ଏହା ସହ ନଭେମ୍ବର ୧୦ରେ ଫଳାଫଳ ପ୍ରକାଶ ପାଇବ। ପ୍ରଥମ ପର୍ଯ୍ୟାୟରେ ୭୧ ବିଧାନସଭା ନିର୍ବାଚନମଣ୍ଡଳୀରେ ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ ଦ୍ୱିତୀୟ ପର୍ଯ୍ୟାୟରେ ୯୪ ବିଧାନସଭା ନିର୍ବାଚନମଣ୍ଡଳୀ ଏବଂ ତୃତୀୟ ପର୍ଯ୍ୟାୟରେ ୭୮ବିଧାନସଭା ନିର୍ବାଚନମଣ୍ଡଳୀରେ ମତଦାନ ହେବ। କରୋନା ମହାମାରୀକୁ ଆଖି ଆଗରେ ରଖି ନିର୍ବାଚନ ପାଇଁ ବ୍ୟାପକ ବ୍ୟବସ୍ଥା କରାଯାଇଥିବା କହିଛନ୍ତି ମୁଖ୍ୟ ନିର୍ବାଚନ କମିଶନର ସୁନୀଲ ଆରୋରା। ତାଙ୍କ କହିବା ମୁତାବକ, ନାମାଙ୍କନ ଏବଂ ଆଫିଡେଭିଟ୍ ଅନ୍ଲାଇନ୍ ରେ ହେବ ଏବଂ ଆରଓରେ ଦାଖଲ ହେବ। ଏହା ସହ ଅନଲାଇନରେ ସୁରକ୍ଷା ଜମା ଦାଖଲ କରାଯାଇପାରିବ। ନାମାଙ୍କନପତ୍ର ଦାଖଲ ପାଇଁ ପ୍ରାର୍ଥୀଙ୍କ ସହିତ ୨ଜଣ ବ୍ୟକ୍ତି ଆସି ପାରିବେ ଏବଂ ନିର୍ବାଚନ ପ୍ରଚାର ପାଇଁ କେବଳ ୫ଜଣ ଯାଇ ପାରିବେ। ମତଦାନ କେନ୍ଦ୍ରରେ ଭିଡ଼ କମ କରିବା ଏବଂ ଭୋଟରଙ୍କୁ ମତଦାନ କରିବାରେ ସାହାଯ୍ୟ କରିବା ପାଇଁ ମତଦାନ ସମୟକୁ ୧ ଅଧିକ ଘଣ୍ଟା ବୃଦ୍ଧି କରାଯାଇଛି। ମତଦାନ ସକାଳ ୭ରୁ ସନ୍ଧ୍ୟା ୫ଟା ପରିବର୍ତ୍ତେ ସନ୍ଧ୍ୟା ୬ଟା ପର୍ଯ୍ୟନ୍ତ ହେବ। ଅବଶ୍ୟ, ଏହା ବାମପନ୍ଥୀ ପ୍ରଭାବିତ ଅଞ୍ଚଳରେ ପ୍ରଯୁଜ୍ୟ ହେବ ନାହିଁ ବୋଲି କହିଛନ୍ତି ନିର୍ବାଚନ କମିଶନର। ନିର୍ବାଚନ ପାଇଁ ୭ଲକ୍ଷରୁ ଅଧିକ ହ୍ୟାଣ୍ଡ ସାନିଟାଇଜର, ପ୍ରାୟ ୪୬ ଲକ୍ଷ ମାସ୍କ, ୬ଲକ୍ଷ ପିପିଇ କିଟ୍, ୬.୭ଲକ୍ଷ ୟୁନିଟ୍ ଫେସଶିଲ୍ଡ, ୨୩ଲକ୍ଷ ହ୍ୟାଣ୍ଡ ଗ୍ଲୋଭସ୍ ର ବ୍ୟବସ୍ଥା କରାଯାଇଛି। ବିଶେଷ ଭାବରେ ଭୋଟରଙ୍କ ପାଇଁ ୭.୨କୋଟି ଏକକ ବ୍ୟବହାର ହ୍ୟାଣ୍ଡ ଗ୍ଲୋଭସ୍ ବ୍ୟବସ୍ଥା କରାଯାଇଛି। ଏହା ସହ ମତଦାନର ଶେଷ ଘଣ୍ଟାରେ, କରୋନା ପୀଡିତମାନେ ସେମାନଙ୍କର ଭୋଟ୍ ଦେବାକୁ ସମର୍ଥ ହେବେ, ଯେଉଁଥିପାଇଁ ପୃଥକ ବ୍ୟବସ୍ଥା କରାଯିବ।
