ଭୁବନେଶ୍ୱର: ପୁଣି ଦମ୍ଭ ଦେଖାଇଲେ ବିଜେଡିର ବରିଷ୍ଠ ନେତା ଦାମୋଦର ରାଉତ। ଆଜି ବିଧାନସଭାରେ ପୂର୍ବତନ ମନ୍ତ୍ରୀ ତଥା ପାରାଦୀପ ବିଧାୟକ ଦାମ ରାଉତ ଏକ ଗୁରୁତ୍ୱପୂର୍ଣ୍ଣ କଥା କହିଛନ୍ତି। ବାରମ୍ୱାର ବିଧାନସଭା ଅଚଳାବସ୍ଥାକୁ ନେଇ ଉଦ୍ବେଗ ପ୍ରକାଶ କରିଥିଲେ ଦାମ। କହିଥିଲେ-“କାମ ନାହିଁ ତ ଦରମା ନାହିଁ। ବିଧାୟକମାନଙ୍କୁ କାମ ଅନୁସାରେ ଭତ୍ତା ମିଳୁ। ଅଧିବେଶନ ବେଳେ ଯେତିକି ସମୟ ଗୃହ ଚାଲୁଛି,ସଦସ୍ୟମାନଙ୍କୁ ସେହି ଅନୁପାତରେ ଭତ୍ତା ମିଳୁ। କମ୍ କାମ କରି ପୂରା ଭତ୍ତା ମିଳିବା ବ୍ୟବସ୍ଥା ବନ୍ଦ ହେଉ।”
ଦାମଙ୍କ କଥାକୁ ସ୍ୱାଗତ କରିଛନ୍ତି ବିରୋଧୀ ଦଳ ମୁଖ୍ୟ ସଚେତକ ତାରା ପ୍ରସାଦ ବାହିନୀପତି। ସେ କହିଛନ୍ତି-“ନୋ ୱାର୍କ ନୋ ପେ। ଯେତେ ଦିନ ବିଧାନସଭା ଚାଲିବ ସେହି ହିସାବରେ ଦରମା ମିଳୁ। ମୁଁ ଏପରି ପ୍ରସ୍ତାବକୁ ସ୍ୱାଗତ କରୁଛି।”
ବିଜେପି ବିଧାୟକ ଦଳ ନେତା କନକ ବର୍ଦ୍ଧନ ସିଂହଦେଓ ମଧ୍ୟ ଦାମଙ୍କ ନୋ ୱାକିଂ ନୋ ପେ ବ୍ୟବସ୍ଥା ଲାଗୁ ଦାବିକୁ ସମର୍ଥନ କରିଛନ୍ତି। ଏପରି ପ୍ରସ୍ତାବ ଆସିଲେ ବିଜେପି ସମର୍ଥନ କରିବ।
Share Now:
