ତେଲକୋଇ: ଗତକାଲି ବିଳମ୍ବିତ ରାତିରେ ଦନ୍ତାହାତୀ ଆକ୍ରମଣରେ ଜଣେ ୬ ବର୍ଷର ଶିଶୁପୁତ୍ର ମୃତ୍ୟୁ ଘଟିଛି। ମା କୋଳରେ ଶିଶୁପୁତ୍ରର ଜୀବନ ଚାଲି ଯାଇଛି। ଏଭଳି ଏକ ଅଭାବନୀୟ ଘଟଣା ଘଟିଯାଇଛି କେନ୍ଦୁଝର ଜିଲ୍ଲା ତେଲକୋଇ ଥାନା ରାଇସୁଆଁ ପଞ୍ଚାୟତ ଅନ୍ତର୍ଗତ ରାଣୀବେଡା ନୂଆସାହିରେ। ଗ୍ରାମର ବିନୋଦ ମହାନ୍ତ କେରଳରେ ଦାଦନ ଶ୍ରମିକ ଭାବେ କାର୍ଯ୍ୟ କରୁଛନ୍ତି। ତେବେ ଗତକାଲି ରାତିରେ ହସ ଖୁସିରେ ଖାଇପିଇ ତାଙ୍କ ସ୍ତ୍ରୀ ରୀତା, ୬ବର୍ଷର ପୁଅ ନାରାୟଣ ଓ ଝିଅ ସ୍ମୃତିରେଖା (୫) ଘରେ ପଲଙ୍କ ଉପରେ ଶୋଇଥିଲେ।
ବିଳମ୍ବିତ ରାତିରେ ଏକ ଦନ୍ତାହାତୀ ଖାଦ୍ୟ ଅନ୍ୱେଷଣରେ ଆସି ଘର କାନ୍ଥ ଭାଙ୍ଗିଥିଲା। କାନ୍ଥ ଭାଙ୍ଗିବା ପରେ ଶୁଣ୍ଢରେ ଝିଅକୁ ଟାଣି ନେବାକୁ ଚେଷ୍ଟା କରୁଥିବା ବେଳେ ରୀତା ହାତୀ କବଳରୁ ତାକୁ ବଞ୍ଚାଇଥିଲେ। ଶୋଇଥିବା ନାରାୟଣ ଉପରେ ଘରର କାନ୍ଥ ପଡ଼ିଯିବାରୁ ଘଟଣା ସ୍ଥଳରେ ତାର ମୃତ୍ୟୁ ଘଟିଥିଲା। ପରେ ଖବର ପାଇ ଗାଁ ଲୋକ ଆସି ଉଦ୍ଧାର କରିଥିଲେ। ତେବେ ସଂଶୟ ଦୂର ପାଇଁ କାମାକ୍ଷାନଗର ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ମୃତ ଘୋଷଣା କରିଥିଲେ। ଏହି ଘଟଣା ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି। ଚଳିତ ବର୍ଷ ନାରାୟଣ ଘର ପାଖ ଝାଟିକିପଶି ସରକାରୀ ପ୍ରାଥମିକ ବିଦ୍ୟାଳୟରେ ପ୍ରଥମ ଶ୍ରେଣୀରେ ନାମ ଲେଖାଇଥିଲା। ହସ ହସ ମୁହଁର ନାରାୟଣର ମୃତ୍ୟୁ ଖବର ସାଙ୍ଗସାଥୀ ଓ ଗାଁରେ ଶୋକର ଛାୟା ଖେଳିଯାଇଛି।
