ଆବୁଜା : ଆଫ୍ରିକୀୟ ଦେଶ ନାଇଜେରିଆରେ ଆତଙ୍କବାଦୀ ସଂଗଠନ ବୋକୋ ହାରାମର ହିଂସାକାଣ୍ଡ ବଢିଯାଇଛି। ମଙ୍ଗଳବାର ରାତିରେ ବୋକୋ ହାରାମର ସଦସ୍ୟମାନେ ରାଜଧାନୀ ଆବୁଜାଠାରେ ଥିବା ଏକ ଜେଲ ଉପରେ ଆକ୍ରମଣ କରି ସେଠାରେ ବନ୍ଦୀ ଥିବା ନିଜର ସଦ୍ୟମାନଙ୍କୁ ଛଡ଼ାଇନେଇଛନ୍ତି। ମିଳିଥିବା ସୂଚନା ଅନୁସାରେ ବୋକୋ ହାରାମ ପକ୍ଷରୁ ମଙ୍ଗଳବାର ରାତିରେ ଜେଲ ଉପରେ ଆକ୍ରମଣ କରାଯାଇଥିଲା। ଏହି ଆକ୍ରମଣରେ ଜେଲର ଜଣେ ସୁରକ୍ଷା ଅଧିକାରୀ ନିହତ ହେବା ସହ ଆଉ ୩ ଜଣ ଆହତ ହୋଇଛନ୍ତି। ଏହି ଜେଲରେ ପ୍ରାୟ ୯୦୦ ଜଣ କଏଦୀ ଥିଲେ। ଏହି ଆକ୍ରମଣ ପରେ ଜେଲରେ ଥିବା କଏଦୀମାନେ ଫେରାର ହୋଇଯାଇଥିଲେ। ଫେରାର କଏଦୀଙ୍କ ମଧ୍ୟରେ ପ୍ରାୟ ୨ ଶହରୁ ଅଧିକ ବୋକୋ ହାରାମ ସଦସ୍ୟ ମଧ୍ୟ ଫେରାର ହୋଇଯାଇଛନ୍ତି। ସେମାନଙ୍କୁ ଧରିବାକୁ ନାଇଜେରିଆ ପୁଲିସ ଓ ସେନା ପକ୍ଷରୁ ସ୍ବତନ୍ତ୍ର ଅଭିଯାନ ଆରମ୍ଭ କରାଯାଇଛି। ଇତି ମଧ୍ୟରେ ସେନା ପକ୍ଷରୁ କେତେକ ଫେରାର କଏଦୀଙ୍କୁ ପୁଣି ଗିରଫ କରାଯାଇଛି। ଜେଲରେ ବନ୍ଦୀଥିବା ନିଜର ସଦସ୍ୟମାନଙ୍କୁ ଛଡ଼ାଇବାକୁ ହିଁ ବୋକୋ ହାରାମ ପକ୍ଷରୁ ଏହି ଆକ୍ରମଣ କରାଯାଇଥିଲା ବୋଲି କୁହାଯାଉଛି। ଆକ୍ରମଣରେ ଜେଲର କେତେକ ଅଂଶ କ୍ଷତିଗ୍ରସ୍ତ ହୋଇଥିବାବେଳେ ଜେଲ ପରିସରରେ ଥିବା କେତେକ ଗାଡ଼ିକୁ ନିଆଁ ଲଗାଇ ଦିଆଯାଇଛି।
ଜେଲ ଉପରେ ଆତଙ୍କବାଦୀ ଆକ୍ରମଣ : ଫେରାର ହୋଇଗଲେ ଶହ ଶହ କଏଦୀ
Share Now: