ନୂଆଦିଲ୍ଲୀ : ଅରବିନ୍ଦ କେଜ୍ରିୱାଲଙ୍କ ଆମ୍ ଆଦ୍ମୀ ପାର୍ଟି (ଆପ୍) ଦିଲ୍ଲୀ ପୌର ନିର୍ବାଚନରେ ୧୩୪ ଆସନ ଜିତି ଜାତୀୟ ରାଜଧାନୀରେ ବିଜେପିର ୧୫ ବର୍ଷ ଶାସନର ଅନ୍ତ ଘଟାଇଛି। ତେବେ ମେୟର ନିର୍ବାଚନ ପାଇଁ ଦୁଇ ଦଳ ଭିତରେ କଡ଼ା ଟକ୍କର ହେବ ବୋଲି ଚର୍ଚ୍ଚା ହେଉଥିବା ବେଳେ ଏବେ ଦିଲ୍ଲୀ ବିଜେପି ମୁଖ୍ୟ ଆଦେଶ ଗୁପ୍ତା ଏହା ଉପରେ ନିଜର ବୟାନ ଦେଇଛନ୍ତି। ଆପ୍ ସଂଖ୍ୟାଗରିଷ୍ଠତା ହାସଲ କରିଥିବାରୁ ପରବର୍ତ୍ତୀ ମେୟର ସେମାନଙ୍କ ଦଳରୁ ହେବ ବୋଲି କହିଛନ୍ତି ଆଦେଶ ଗୁପ୍ତା।
ଦିଲ୍ଲୀ ବିଜେପି ସଭାପତି ଆଦେଶ ଗୁପ୍ତା ଜାତୀୟ ଗଣମାଧ୍ୟମ ଏନଡିଟିଭିକୁ ସାକ୍ଷାତକାର ଦେଇ ସ୍ପଷ୍ଟ କରିଛନ୍ତି ଯେ, ଆପ୍ ସଂଖ୍ୟାଗରିଷ୍ଠତା ହାସଲ କରିଛି, ପରବର୍ତ୍ତୀ ମେୟର ଆମ୍ ଆଦମୀ ପାର୍ଟିରୁ ହିଁ ହେବେ। ଏମସିଡିରେ ବିଜେପି ଆପର ବିରୋଧୀ ଦଳର ଭୂମିକା ଗ୍ରହଣ କରିବ। ୱାଚଡଗ୍ ପରି ଆମେ ଏମସିଡିରେ କୌଣସି ଦୁର୍ନୀତିକୁ ଅନୁମତି ଦେବୁ ନାହିଁ। ଦିଲ୍ଲୀ ପରିଷ୍କାର ହେବା ଉଚିତ ଏବଂ ଏମସିଡି ଭଲ କାମ କରିବା ଉଚିତ। ଏହା ଆମର ପ୍ରାଥମିକତା ହେବ। ଏହାପୂର୍ବରୁ ସେ କହିଥିଲେ ଯେ ମେୟର କେବଳ ବିଜେପିର ହେବ, କିନ୍ତୁ ବର୍ତ୍ତମାନ ବିଜେପି ଏହି ପ୍ରସଙ୍ଗରେ ୟୁ-ଟର୍ନ ମାରିଛି।
