ଟିମରେ ଓଡ଼ିଆ ପୁଅ ନକୁଳ ବଡ଼ନାୟକ
ବେଙ୍ଗାଲୁରୁ : ଦୃଷ୍ଟିହୀନ ଟି-୨୦ କ୍ରିକେଟରେ ଭାରତ ବିଶ୍ବ ଚାମ୍ପିଅନ ହୋଇଛି। ବେଙ୍ଗାଲୁରୁର ଏନ.ଚିନ୍ନାସ୍ବାମୀ ଷ୍ଟାଡିୟମଠାରେ ଆଜି ଖେଳାଯାଇଥିବା ମ୍ୟାଚରେ ଭାରତ ବାଂଲାଦେଶକୁ ୧୨୦ ରନରେ ପରାସ୍ତ କରି ଏକ ବଡ଼ ବିଜୟ ହାସଲ କରିଛି। ପ୍ରଥମେ ବ୍ୟାଟିଂ କରି ଭାରତ ୨ ଓ୍ବିକେଟ ହରାଇ ୨୭୭ ରନ କରିଥିଲା। ଭାରତ ପକ୍ଷରୁ ରମେଶ ୧୬୩ ରନ କରିଥିବାବେଳେ ଅଜୟ ୧୦୦ ରନ କରିଥିଲେ। ଏହାର ଜବାବରେ ବାଂଲାଦେଶ ୩ ଓ୍ବିକେଟ ହରାଇ ୧୫୭ ରନ କରିପାରିଥିଲା। ଏହି ବିଜୟ ହେଉଛି ଭାରତର ୩ୟ ଟି-୨୦ ବିଶ୍ବକପ୍ ଟାଇଟେଲ୍। ପୂର୍ବରୁ ୨୦୧୨ ଓ ୨୦୧୭ରେ ହୋଇଥିବା ଦୃଷ୍ଟିହୀନ ଟି-୨୦ ବିଶ୍ବକପରେ ବି ଭାରତ ଚାମ୍ପିଅନ ହୋଇଥିଲା। ଏହି ବିଶ୍ବ ବିଜୟୀ ଟିମରେ ଓଡ଼ିଶାର ଖେଳାଳି ନକୁଳ ବଡ଼ନାୟକ ବି ରହିଛନ୍ତି। ଏହି ଟୁର୍ଣ୍ଣାମେଣ୍ଟରେ ପାକିସ୍ତାନ ଦଳ ଭାଗ ନେଇପାରିନଥିଲା। ଭିସା ସମସ୍ୟା ଯୋଗୁଁ ପାକିସ୍ତାନ ଟିମ ଭାରତ ଆସିପାରିନଥିଲା। ଏଥିପାଇଁ ଟୁର୍ଣ୍ଣାମେଣ୍ଟ ଆରମ୍ଭରୁ ବିବାଦୀୟ ପରିସ୍ଥିତି ଦେଖାଦେଇଥିଲା। ଆସନ୍ତା ୨୦୨୪ରେ ୪ର୍ଥ ଦୃଷ୍ଟିହୀନ ଟି-୨୦ ବିଶ୍ବକପ ଅନୁଷ୍ଠିତ ହେବ। ଏହି ବିଶ୍ବକପକୁ ପାକିସ୍ତାନ ଆୟୋଜନ କରୁଛି। ବିଶ୍ବ ଦୃଷ୍ଟିହୀନ କ୍ରିକେଟ ବୋର୍ଡ ଏହି ଦାୟିତ୍ବ ପାକିସ୍ତାନକୁ ଦେଇଛି।