ନୂଆଦିଲ୍ଲୀ : ଉପସାଗରୀୟ ଅଞ୍ଚଳରେ ଯୁଦ୍ଧର କଳାବାଦଲ ଦେଖାଦେଇଛି। ଗୋଟିଏ ପଟେ ଇସ୍ରାଏଲ ଉପରେ ରକେଟ ମାଡ ପରେ ଏହି ଦେଶ ଯୁଦ୍ଧ ପ୍ରସ୍ତୁତି ଆରମ୍ଭ କରିଦେଇଥିବାବେଳେ ଅନ୍ୟପଟେ ଇରାନ ଓ ଆମେରିକା ମଧ୍ୟରେ ଉତ୍ତେଜନା ଦେଖାଦେଇଛି। ଇରାନ ସହ ଉତ୍ତେଜନା ବଢ଼ୁଥିବା ବେଳେ ଆମେରିକା ଉପସାଗରୀୟ ଅଞ୍ଚଳରେ ଏକ ପରମାଣୁ ଶକ୍ତି ସଂପନ୍ନ ତଥା କ୍ରୁଜ୍ କ୍ଷେପଣାସ୍ତ୍ରରେ ସଜ୍ଜିତ ବୁଡ଼ାଜାହାଜ (ମିସାଇଲ ସବମେରିନ) ମୁତୟନ କରିଛି। ୟୁଏସ୍ଏସ୍ ଫ୍ଲୋରିଡା ଏକ ପରମାଣୁ ଶକ୍ତି ସମ୍ପନ୍ନ ଜାହାଜ ଯାହା ୧୫୪ଟି ଟମାହକ୍ ଲ୍ୟାଣ୍ଡ ଆଟାକ୍ କ୍ରୁଜ୍ କ୍ଷେପଣାସ୍ତ୍ର ବହନ କରିବାରେ ସକ୍ଷମ। ଆମେରିକୀୟ ନୌସେନା ସେଣ୍ଟ୍ରାଲ କମାଣ୍ଡ ଅନୁଯାୟୀ, ଶୁକ୍ରବାର ଦିନ ଏହା ଭୂମଧ୍ୟସାଗରରୁ ସୁଏଜ୍ କେନାଲ ଅତିକ୍ରମ କରିବା ଆରମ୍ଭ କରିଥିଲା।
ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ବୁଡ଼ାଜାହାଜକୁ ଆମେରିକାର ପଞ୍ଚମ ନୌଭେଳା ଅଧିନରେ ମୁତୟନ କରାଯାଇଛି। ବାହାରିନରେ ଥିବା ଆମେରିକାର ନୌସେନା ଘାଟିରେ ଏହି ନୌଭେଳା ରହିଛି। ତେବେ ବାହାରିନ୍ ସ୍ଥିତ ଆମେରିକୀୟ ନୌସେନାର ମୁଖପାତ୍ର ଏହି ମିଶନ ସମ୍ପର୍କରେ ଅଧିକ ବିବରଣୀ ଦେବାକୁ ମନା କରିଦେଇଛନ୍ତି। ଗତ ମାସରେ ଆମେରିକା ସେନା ସିରିଆରେ ଇରାନ ସମର୍ଥିତ ଗୋଷ୍ଠୀ ଉପରେ ଏୟାର ଷ୍ଟ୍ରାଇକ୍ କରିଥିଲା। ଏହାର ଜବାବରେ ଉତ୍ତର-ପୂର୍ବ ସିରିଆରେ ଥିବା ଆମେରିକାର ଏକ ସାମରିକ କେନ୍ଦ୍ର ଉପରେ ଇରାନ ଡ୍ରୋନ୍ ଆକ୍ରମଣ କରିଥିଲା। ଏହି ଆକ୍ରମଣରେ ଜଣେ ଆମେରିକୀୟ ଠିକାଦାରଙ୍କ ମୃତ୍ୟୁ ଘଟିଥିଲା।
