ଭୁବନେଶ୍ବର : ବୁଧବାରଦିନ ଛତିଶଗଡ଼ର ଦାନ୍ତେଓ୍ବାଡ଼ାରେ ସୁରକ୍ଷାକର୍ମୀଙ୍କ ଉପରେ ହୋଇଥିବା ମର୍ମନ୍ତୁଦ ଆକ୍ରମଣ ପାଇଁ ଭାରତୀୟ କମ୍ୟୁନିଷ୍ଟ ପାର୍ଟି (ମାଓବାଦୀ)ର ଦରଭା ଡିଭିଜନ ନିଜକୁ ଦାୟୀ କରିଛି। ବ୍ରାହ୍ମଣବାଦୀ ହିନ୍ଦୁତ୍ବ ଓ ଫାସିବାଦୀ କେନ୍ଦ୍ର ସରକାର ଓ ଜନବିରୋଧୀ ରାଜ୍ୟ ସରକାର ସାଧାରଣ ଲୋକଙ୍କ ଉପରେ କରୁଥିବା ଅତ୍ଯାଚାର ଜବାବରେ ଏହି ଆକ୍ରମଣ କରାଯାଇଛି ବୋଲି ଦରଭା ଡିଭିଜନ କମିଟିର ସଚିବ ସାଇନାଥ ଏକ ପ୍ରେସ ବିଜ୍ଞପ୍ତି ଜାରି କରି କହିଛନ୍ତି।
ଏହି ପ୍ରେସ ବିଜ୍ଞପ୍ତିରେ କୁହାଯାଇଛି ଯେ, ଆସନ୍ତା ୨୦୨୪ ଲୋକସଭା ନିର୍ବାଚନ ପୂର୍ବରୁ ନକ୍ସଲମାନଙ୍କୁ ନିର୍ମୂଳ କରିବାକୁ ଘୋଷଣା କରି ସାଧାରଣ ଜନତାଙ୍କ ଉପରେ ଅତ୍ୟାଚାର ଚଳାଇଛନ୍ତି। ଏଥିପାଇଁ ବସ୍ତର ଅଂଚଳକୁ ଏକରକମ ଏକ ସୈନ୍ୟ ଛାଉଣୀରେ ପରିରଣ କରାଯାଇଛି। ବିଦେଶୀ ଶତ୍ରୁଙ୍କ ପରି ନିଜ ଦେଶର ଲୋକମାନଙ୍କ ଉପରେ ଆକାଶମାର୍ଗରୁ ହମଲା କରୁଛନ୍ତି। ଏପରିସ୍ଥିତିରେ ଏହାର ପ୍ରତିରୋଧ କରିବାଛଡ଼ା ଜନତାଙ୍କ ପାଖରେ ଆଉ କୌଣସି ଚାରା ନାହିଁ। ସେହିପରି ପୁଲିସମାନଙ୍କୁ ଏହି ପ୍ରେସ ବିଜ୍ଞପ୍ତିରେ କୁହାଯାଇଛି ଯେ ସେମାନେ ସରକାରଙ୍କ ଏହି ଜନବିରୋଧୀ କାର୍ଯ୍ୟାନୁଷ୍ଠାନରେ ଭାଗନିଅନ୍ତୁ ନାହିଁ। ମାଓବାଦୀଙ୍କ ଲଢେଇ ପୁଲିସ କର୍ମୀଙ୍କ ବିରୋଧରେ ନୁହେଁ, ବରଂ ସାମନ୍ତବାଦୀ ଓ ପୁଞ୍ଜିପତି ସରକାର ଓ ଅମଲାତନ୍ତ୍ର ବିରୋଧରେ ବୋଲି ଏଥିରେ ସ୍ପଷ୍ଟ କରାଯାଇଛି।
