ତେହେରାନ: ବୁଧବାର ସକାଳେ ଇରାନରେ ହୋଇଥିବା ବିସ୍ଫୋରଣରେ ଏକ ପ୍ରାକୃତିକ ଗ୍ୟାସ ପାଇପଲାଇନ ଗୁରୁତରଭାବେ କ୍ଷତିଗ୍ରସ୍ତ ହୋଇଛି। ଜଣେ ଅଧିକାରୀ ଏହି ବିସ୍ଫୋରଣକୁ ଆତଙ୍କବାଦୀ କାର୍ଯ୍ୟ ବୋଲି କହିଛନ୍ତି। ଗାଜା ଉପତ୍ୟକାରେ ହାମାସ ବିରୋଧରେ ଇସ୍ରାଏଲର ଯୁଦ୍ଧ ମଧ୍ୟରେ ମଧ୍ୟପ୍ରାଚ୍ୟରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି। ଏହି ବିସ୍ଫୋରଣ ଯୋଗୁଁ ଇରାନର ପଶ୍ଚିମ ଚହରମହଲ ଓ ବଖତିଆରି ପ୍ରଦେଶରୁ କାସ୍ପିଆନ୍ ସାଗରର ଉତ୍ତରରେ ଥିବା ସହରକୁ ପ୍ରାକୃତିକ ଗ୍ୟାସ୍ ପାଇପ୍ ଲାଇନ୍ ପ୍ରଭାବିତ ହୋଇଛି। ତେବେ ଏ ନେଇ ଇରାନ ସରକାର ବିଶେଷ କିଛି ସୂଚନା ଦେଇନାହାନ୍ତି।
୧୨୭୦ କିଲୋମିଟର ଲମ୍ବର ଏହି ପାଇପଲାଇନ୍ ଇରାନର ଦକ୍ଷିଣରେ ଥିବା ଗ୍ୟାସ୍ ଫିଲ୍ଡ ହବ୍ ଆସାଲୁୟେହରୁ ଆରମ୍ଭ ହୋଇଛି। ଇରାନର ଗ୍ୟାସ ନେଟୱାର୍କ କଣ୍ଟ୍ରୋଲ ସେଣ୍ଟରର ମ୍ୟାନେଜର ସଇଦ ଅଘାଲି ଇରାନର ସରକାରୀ ଟେଲିଭିଜନକୁ କହିଛନ୍ତି ଯେ ଏକ କ୍ଷତିକାରକ ଏବଂ ଆତଙ୍କବାଦୀ କାର୍ଯ୍ୟ ଯୋଗୁଁ ପାଇପଲାଇନ ନିକଟବର୍ତ୍ତୀ ଅନେକ ଅଞ୍ଚଳରେ ବିସ୍ଫୋରଣ ଘଟିଛି। ବିସ୍ଫୋରଣ ପାଇଁ ଅଘାଲି କୌଣସି ସନ୍ଦିଗ୍ଧ କିମ୍ବା ଗୋଷ୍ଠୀର ନାମ ଉଲ୍ଲେଖ କରିନାହାଁନ୍ତି। ଅତୀତରେ ଦକ୍ଷିଣ-ପଶ୍ଚିମ ଇରାନରେ ତୈଳ ପାଇପଲାଇନ ଉପରେ ହୋଇଥିବା ଆକ୍ରମଣ ପାଇଁ ଆରବ ବିଚ୍ଛିନ୍ନତାବାଦୀମାନେ ନିଜକୁ ଦାୟୀ କରିଛନ୍ତି। ତେବେ ପାଇପ୍ ଲାଇନ୍ ଭଳି ଭିତ୍ତିଭୂମି ଉପରେ ଏଭଳି ଆକ୍ରମଣ ଅତ୍ୟନ୍ତ ବିରଳ ଘଟଣା ବୋଲି କୁହାଯାଉଛି।
