ମାଲକାନଗିରି : ମାଲକାନଗିରିର ଜିଲ୍ଲା ସୀମାନ୍ତ ଛତିଶଗଡର ଦନ୍ତେଵାଡା ପୁଲିସକୁ ମିଳିଛି ବଡ଼ ସଫଳତା। ପୁଲିସ ନକ୍ସଲ ଗୁଳିବିନିମୟରେ ଜଣେ ମହିଳା ହାର୍ଡକୋର ମାଓବାଦୀର ମୃତ୍ୟୁ ହୋଇଛି। ବିଶେଷ ସୂତ୍ରରୁ ଖବର ପାଇ ଦନ୍ତେଵାଡା ଜିଲ୍ଲା ପୁଲିସ,ଡିଆରଜି ଯବାନ ଗୁମଲନାର ଜଙ୍ଗଲରେ ଚଡାଉ କରିଥିଲେ। ଏଠାରେ ପୂର୍ବରୁ ମାଓବାଦୀମାନେ କ୍ୟାମ୍ପ କରି ରହିଥିଲେ। ପୁଲିସକୁ ଦେଖି ମାଓବାଦୀମାନେ ଅତର୍କିତ ଗୁଳି ଚଳାଇଥିଲେ। ଯବାନ ମଧ୍ୟ ନିଜକୁ ସୁରକ୍ଷିତ କରି ପାଲଟା ଜବାବ ଦେଇଥିଲେ।ଦୀର୍ଘ ସମୟ ଧରି ଗୁଳି ବିନିମୟ ହୋଇଥିଲା। ତେବେ ଏହି ଗୁଳିବିନିମୟରେ ଯବାନଙ୍କର କୌଣସି କ୍ଷତି ହୋଇନଥିବା ବେଳେ ଜଣେ ମହିଳା ମାଓବାଦୀର ଶବକୁ ଘଟଣାସ୍ଥଳରୁ ଉଦ୍ଧାର କରାଯାଇଛି। ଏଥିସହ ବିପୁଳ ପରିମାଣରେ ମାଓ ବିସ୍ଫୋରକ,ବନ୍ଧୁକ ସମେତ ଦୈନନ୍ଦୀନ ସାମଗ୍ରୀ ମଧ୍ୟ ଜବତ କରାଯାଇଛି। ମୃତ ମହିଳା ମାଓବାଦୀର ଶବ ଚିହ୍ନଟ କରାଯାଇଛି। ସେ ହେଉଛି ପାୟୋକେ ବେକ୍। ପାୟୋକେ ନାମରେ ସରକାର ୨ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଥିଲେ। ତେବେ ଘଟଣାସ୍ଥଳର ପରିବେଶକୁ ଲକ୍ଷ୍ୟ କଲେ ବହୁ ନକ୍ସଲ ମୃତାହତ ହୋଇଥିବା ଜଣାପଡୁଥିବା ଏସପି ଅଭିଷେକ ପଲ୍ଲବ ପ୍ରକାଶ କରିଛନ୍ତି।
ଓଡ଼ିଶା-ଛତିଶଗଡ଼ ସୀମାରେ ଏନକାଉଣ୍ଟର: ଜଣେ ମହିଳା ମାଓବାଦୀ ମୃତ
Share Now: