ଖଇରପୁଟ : କରୋନା ମହାମାରୀ ସମୟରେ ମାଲକାନଗିରି ଜିଲ୍ଲା ଅନ୍ତର୍ଗତ ଖଇରପୁଟ ବ୍ଲକର ମୁଦୁଲିପଡ଼ା ଓ ପୁରୁଣା ଗୁମ୍ମା ଅଞ୍ଚଳ ଗସ୍ତ କରିଛନ୍ତି ଆଦିବାସୀ ଓ ହରିଜନ କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା। ବର୍ତ୍ତମାନ ସମୟରେ କରୋନା ପ୍ରକୋପରେ ସମସ୍ତେ ପୀଡିତ। ଆଦିମ ଅଧିବାସୀ ବୋଲାଉଥିବା ବଣ୍ଡା ଓ ଦିଦାୟୀ ସମ୍ପ୍ରଦାୟର ଲୋକମାନେ ମଧ୍ୟ ଏଥିରୁ ବଡ଼ ପଡି ନାହାନ୍ତି। ବଣ୍ଡା ଘାଟିରେ କରୋନା ସଂକ୍ରମଣ ଖବର ପାଇବା ପରେ ଆଜି ଜିଲ୍ଲା ପ୍ରଶାସନ, ବ୍ଲକ ପ୍ରଶାସନ, ଦିଦାୟୀ ଉନ୍ନୟନ ସଂସ୍ଥା, ୟୁଜେଏ ସାମ୍ବାଦିକ ସଂଘ ସମେତ ଆଦିବାସୀ ଓ ହରିଜନ ମନ୍ତ୍ରୀ ଜଗନ୍ନାଥ ସାରକା ବଣ୍ଡା ଘାଟିରେ ପହଞ୍ଚିଥିଲେ। ମନ୍ତ୍ରୀ ଶ୍ରୀ ସାରକା ବଣ୍ଡା ଘାଟିରେ ଥିବା ଜନଜାତି ସମ୍ପ୍ରଦାୟର ଲୋକ ମାନଙ୍କୁ କରୋନା ସଚେତନ କରାଇବା ସହ ରନ୍ଧା ଖାଦ୍ୟ ଓ ମାସ୍କ ବଣ୍ଟନ କରିଥିଲେ।
ପରେ ମୁଦୁଲିପଡ଼ା ଠାରେ ଥିବା ଟିଏମସିରେ ସଂକ୍ରମିତ କରୋନା ରୋଗୀଙ୍କୁ ଭେଟି ସେମାନଙ୍କ ସ୍ୱାସ୍ଥ୍ୟ ଓ ଖାଦ୍ୟ ସମ୍ପର୍କରେ ପଚାରି ବୁଝିଥିଲେ। ଲୋକମାନଙ୍କର ଯେପରି ଅସୁବିଧା ନ ହୁଏ ସେଥିପାଇଁ ପ୍ରଶାସନ ସହ ଆଲୋଚନା କରିଥିଲେ। ଏହି ଗସ୍ତରେ ମନ୍ତ୍ରୀଙ୍କ ସହ ଚିତ୍ରକୋଣ୍ଡା ବିଧାୟକ,ପଟାଙ୍ଗୀ ଵିଧାୟକ, ବିହନ ନିଗମ ଅଧ୍ୟକ୍ଷ, ଶିଶୁ କଲ୍ୟାଣ ବିଭାଗ ଅଧ୍ୟକ୍ଷ, ଜିଲ୍ଲା ବିଜେଡି କାର୍ଯ୍ୟକାରୀ ସଭାପତି, ବ୍ଲକ ଅଧ୍ୟକ୍ଷା, ସ୍ଥାନୀୟ ସରପଞ୍ଚ, ସାଂସଦ ଓ ବିଧାୟକଙ୍କ ପ୍ରତିନିଧି ତଥା ସ୍ଥାନୀୟ ନେତୃବର୍ଗ ଉପସ୍ଥିତ ଥିଲେ। ମନ୍ତ୍ରୀଙ୍କ ଗସ୍ତକୁ ଦେଖି ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଥିଲା।
