ନୂଆଦିଲ୍ଲୀ : କିଛି ଦିନ ତଳେ ପାକିସ୍ତାନୀ ଆତଙ୍କବାଦୀମାନଙ୍କ ଦ୍ବାରା ଛୋଟ ଛୋଟ ଡ୍ରୋନ ବ୍ୟବହାର କରି ଜମ୍ମୁ ସ୍ଥିତ ଭାରତୀୟ ବାୟୁସେନା ଘାଟି ଉପରେ ବୋମା ବିସ୍ଫୋରଣ କରିବା ପରେ ଭାରତୀୟ ସେନାର ଚେତା ପଶିଛି। ଭବିଷ୍ୟତରେ କିପରି ଏଭଳି ଚ୍ୟାଲେଞ୍ଜର ମୁକାବିଲା କରାଯିବ ତାହାକୁ ନେଇ ଭାରତୀୟ ସାମରିକ ବାହିନୀ ପ୍ରସ୍ତୁତି ଆରମ୍ଭ କରିଦେଇଛି। ମିଳିଥିବା ସୂଚନା ଅନୁସାରେ ଭାରତ ଇସ୍ରାଏଲଠାରୁ ଡ୍ରୋନ ପ୍ରତିରକ୍ଷା ବ୍ୟବସ୍ଥା ଖରିଦ କରିବାକୁ ନିଷ୍ପତ୍ତି ନେଇଛି। ଇସ୍ରାଏଲ ଏରୋସ୍ପେଶ ଇଣ୍ଡଷ୍ଟ୍ରିଜ(ଆଇଏଆଇ) ଠାରୁ ଭାରତ ଏଲି-୪୦୩୦ ଡ୍ରୋନ ଗାର୍ଡ ସିଷ୍ଟମ ଖରିଦ କରିବାକୁ ବୁଝମଣା ହୋଇଛି। ବିଶ୍ବର ଜଣାଶୁଣା ପ୍ରତିରକ୍ଷା ପତ୍ରିକା ଜେନ୍ସ ରେ ପ୍ରକାଶିତ ଏକ ରିପୋର୍ଟ ଅନୁସାରେ ଆଇଏଆଇ ଏକ ଦକ୍ଷିଣ ଏସୀୟ ଦେଶକୁ ଏଲି-୪୦୩୦ ଡ୍ରୋନ ଗାର୍ଡ ସିଷ୍ଟମ ବିକ୍ରି କରିଛି। ଏହି ଦକ୍ଷିଣ ଏସୀୟ ଦେଶ ଭାରତ ବୋଲି କୁହାଯାଉଛି। ଇସ୍ରାଏଲର ଏହି ଡ୍ରୋନ ପ୍ରତିରକ୍ଷା ବ୍ୟବସ୍ଥା ସ୍ବଳ୍ପ, ମଧ୍ୟମ ଓ ଦୂରଗାମୀ ରେଞ୍ଜ ସହ ଆସୁଛି। ଏହା ଯେକୌଣସି ଡ୍ରୋନକୁ ଆକାଶ ମାର୍ଗରେ ହିଁ ଧ୍ବଂସ କରିବାକୁ ସକ୍ଷମ। ଏହି ବ୍ୟବସ୍ଥାକୁ ସେନାର ବିଭିନ୍ନ ଗୁରୁତ୍ବପୂର୍ଣ୍ଣ ପ୍ରତିଷ୍ଠାନରେ ମୁତୟନ କରାଯିବ।
