ଗୁଜୁରାଟରେ ୨୧ ହଜାର କୋଟିର ହେରୋଇନ ଜବତ
ନୂଆଦିଲ୍ଲୀ : ଆଫଗାନିସ୍ତାନରେ କ୍ଷମତାକୁ ଫେରୁ ଫେରୁ ତାଲିବାନ ନିଜର ପୁରୁଣା ବ୍ୟବସାୟ ଆରମ୍ଭ କରିଦେଲାଣି। ଗତ ସପ୍ତାହରେ ଗୁଜୁରାଟର ମୁନ୍ଦ୍ରା ବନ୍ଦରରୁ ୨୧ ହଜାର କୋଟି ଟଙ୍କା ମୂଲ୍ୟର ପ୍ରାୟ ୩ ହଜାର କିଲୋଗ୍ରାମ ହେରୋଇନ ଧରାପଡ଼ିବା ପରେ ଏହି ସଂଦେହ ଦୃଢ ହେବାରେ ଲାଗିଛି। ପୂର୍ବର ଅସରଫ ଗନି ସରକାରରେ ଡ୍ରଗ୍ସ ଚୋରାଚାଲାଣ ଉପରେ ନିଷେଧାଜ୍ଞା ଲଗାଯାଇଥିଲା। କିନ୍ତୁ ଡ୍ରଗ୍ସ ଚୋରା କାରବାର ତାଲିବାନର ମୁଖ୍ୟ ଆୟସ୍ରୋତ ହୋଇଥିବାରୁ ତାଲିବାନ ଏହାକୁ ପୁଣି ଆରମ୍ଭ କରିଦେଇଛି। ଗତ ସପ୍ତାହରେ ଭାରତର ରାଜସ୍ବ ଗୁଇନ୍ଦା ନିର୍ଦ୍ଦେଶାଳୟ ପକ୍ଷରୁ ମୁନ୍ଦ୍ରା ବନ୍ଦରରୁ ଦୁଇଟି କଣ୍ଟେନରରେ ଏସବୁ ହେରୋଇନକୁ ଚିହ୍ନଟ କରାଯାଇଥିଲା। ଏସବୁ ନିଶାଦ୍ରବ୍ୟ ଆଫଗାନିସ୍ତାନର କାନ୍ଦାହାରରୁ ପାକିସ୍ତାନ ଦେଇ ଆସିଥିବା ଜଣାପଡ଼ିଛି। ଭାରତର କେନ୍ଦ୍ରୀୟ ପରୀକ୍ଷାଗାରରେ କରାଯାଇଥିବା ନମୁନା ପରୀକ୍ଷଣରୁ ଜଣାପଡ଼ିଛି ଯେ ଏସବୁ ହେରୋଇନ ଅତି ଉଚ୍ଚ ମାନର। କାନ୍ଦାହାର ତାଲିବାନର ଗଡ଼ ହୋଇଥିବାରୁ ଏତେ ବଡ଼ ପରିମାଣର ହେରୋଇନ ତାଲିବାନ ହିଁ ପଠାଇଥାଇପାରେ ବୋଲି ସନ୍ଦେହ କରାଯାଉଛି। ଏଥିରେ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇ ମଧ୍ୟ ସଂପୃକ୍ତ ଥିବା କୁହାଯାଉଛି। ଏହି ମାମଲାରେ ଦିଲ୍ଲୀରେ ଥିବା କିଛି ଆଫଗାନ ନାଗରିକଙ୍କୁ ଅଟକ ରଖି ପଚରା ଉଚୁରା କରାଯାଉଛି।