ତାଇପେଇ : ଚୀନର ସମରାଭ୍ୟାସ ଶେଷ ହେବା ପରେ ତାଇଓ୍ବାନ ମଧ୍ୟ ନିଜର ଦମ୍ ଦେଖାଇବା ଆରମ୍ଭ କରିଛି। ତାଇଓ୍ବାନ ସାମରିକ ବାହିନୀ ପକ୍ଷରୁ ଆଜି ଲାଇଭ୍ ଫାୟାର ଡ୍ରିଲ ଆରମ୍ଭ କରାଯାଇଛି। ଲାଇଭ୍ ଫାୟାର ଡ୍ରିଲର ଅର୍ଥ ହେଉଛି ଯେଉଁ ସମରାଭ୍ୟାସରେ କାଳ୍ପନିକ ଟାର୍ଗେଟ୍ ଉପରେ ସତସତିକା ବୋମାବର୍ଷଣ କରାଯାଇଥାଏ। ଏହି ସମରାଭ୍ୟାସ ଅଧିନରେ ତାଇଓ୍ବାନର ଲଢୁଆ ବିମାନ ଉଡ଼ିବା ସହ ହାଓ୍ବିତଜର ତୋପରୁ ଗୋଳା ବର୍ଷଣ କରାଯାଇଛି। ପିଙ୍ଗଟନ୍ ଅଂଚଳରେ ଏହି ସମରାଭ୍ୟାସ କରାଯାଇଛି। ଏହି ସମରାଭ୍ୟାସ ମାଧ୍ୟମରେ ସମ୍ଭାବ୍ୟ ଚୀନ ଆକ୍ରମଣରୁ କିପରି ତାଇଓ୍ବାନକୁ ସୁରକ୍ଷା ଦିଆଯିବ, ସେ ନେଇ ପ୍ରସ୍ତୁତି କରାଯାଇଛି। ଗତ କାଲି ଚୀନ ପକ୍ଷରୁ ପ୍ରକାଶିତ ଏକ ଶ୍ବେତପତ୍ରରେ କୁହାଯାଇଥିଲା ଯେ, ଚୀନ ସହିତ ତାଇଓ୍ବାନର ଏକୀକରଣକୁ ଶାନ୍ତିପୂର୍ଣ୍ଣ ଉପାୟରେ ସାକାର କରିବା ଉପରେ ଚୀନ ସରକାର ଗୁରୁତ୍ବ ଦେଉଛନ୍ତି। ମାତ୍ର କେତେକ ବାହ୍ୟ ଶତ୍ରୁ ତାଇଓ୍ବାନକୁ ଚୀନ ବିରୋଧରେ ଉସୁକାଉଛନ୍ତି। ସେମାନଙ୍କୁ ବଳ ପ୍ରୟୋଗ କରି ଜବାବ ଦିଆଯିବ। ଏହାର ଜବାବରେ ତାଇଓ୍ବାନର ମେନଲାଣ୍ଡସ ଆଫାୟାର୍ସ କାଉନସିଲ (ଚୀନ ଉପରେ ତାଇଓ୍ବାନର ସର୍ବୋଚ୍ଚ ନୀତି ନିର୍ଦ୍ଧାରଣକାରୀ ପରିଷଦ) ପକ୍ଷରୁ କୁହାଯାଇଛି ଯେ, ଉଭୟ ଚୀନ ଓ ତାଇଓ୍ବାନ କେହି କାହାର ଅନ୍ତର୍ଗତ ନୁହନ୍ତି। ଗୋଟିଏ ଦେଶ ଦୁଇଟି ବ୍ୟବସ୍ଥାକୁ ମଧ୍ୟ ତାଇଓ୍ବାନର ଏହି ପରିଷଦ ପ୍ରତ୍ୟାଖ୍ୟାନ କରିଦେଇଛି।
