ନୂଆଦିଲ୍ଲୀ: ୟୁକେନ୍ରେ ଯୁଦ୍ଧ କରିବା ନିମନ୍ତେ ମହିଳା କଏଦୀମାନଙ୍କୁ ପଠାଇବା ପାଇଁ ରୁଷୀୟ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ଯୋଜନା କରୁଥିବା କଥା ତାଙ୍କର ଜଣେ ଅନ୍ତଃରଙ୍ଗ ବନ୍ଧୁ ତଥା ପାରାମିଲିଟାରି ସ୍ୱେଚ୍ଛାସେବୀ ସଂଗଠନ ‘ୱାଗ୍ନର୍ ଗ୍ରୁପ୍’ର ସଂସ୍ଥାପକ ୟେଭ୍ଗେନି ପ୍ରିଗୋଝିନ୍ କହିଥିବା କଥା ‘ନ୍ୟୁୟର୍କ ପୋଷ୍ଟ୍’ ରିପୋର୍ଟ କରିଛି। ‘ନ୍ୟୁୟର୍କ ପୋଷ୍ଟ୍’ ରିପୋର୍ଟ ଅନୁସାରେ, ପ୍ରିଗୋଝିନ୍ କହିଛନ୍ତି ଯେ, ୟୁକ୍ରେନ୍ରେ ଲକ୍ଷ୍ୟଭେଦୀ ଗୁଳିଚାଳିକା ଓ ବିଧ୍ୱଂସିକା ଭାବେ କାର୍ଯ୍ୟ କରିବା ଲାଗି ସେ ମହିଳା କଏଦୀମାନଙ୍କୁ ପଠାଇବା ପାଇଁ ବ୍ୟବସ୍ଥା କରୁଛନ୍ତି। ‘କ୍ୟାଟରିଙ୍ଗ୍’ କମ୍ପାନି ଚଳାଉଥିବାରୁ ପୁଟିନ୍ଙ୍କ ପାଚକ କୁହାଯାଉଥିବା ପ୍ରିଗୋଝିନ୍ ବୁଧବାର ଦିନ ନିଜ ବ୍ୟବସାୟ ପ୍ରତିଷ୍ଠାନର ପ୍ରେସ୍ ସେବା ରିଲିଜ୍ କରିଥିବା ବିବୃତିରେ ପୁଟିନ୍ଙ୍କ ଯୋଜନା ବିଷୟରେ ପ୍ରଘଟ କରିଛନ୍ତି। ରୁଷ୍ର ସ୍ଭେର୍ଦଲୋଭ୍ସ୍କ୍ ଅଞ୍ଚଳର ସାଂସଦ ତଥା ପୁଟିନ୍ଙ୍କ ଘନିଷ୍ଠ ମିତ୍ର ଭିୟାଚେସ୍ଲାଭ୍ ଭେଗ୍ନର୍ ଦେଇଥିବା ପ୍ରସ୍ତାବ ସଂକ୍ରାନ୍ତ ପ୍ରଶ୍ନର ଉତ୍ତର ଦେଇ ପ୍ରିଗୋଝିନ୍ କହିଛନ୍ତି ଯେ, ଡାକ୍ତର, ନର୍ସ ଓ କମ୍ୟୁନିକେସନ୍ ଅପରେଟର୍ ଭାବେ ୟୁକ୍ରେନ୍ରେ ମୁତୟନ ହେବା ଲାଗି ପ୍ରସ୍ତୁତି କରାଯାଉଥିବା ସ୍ଥାନୀୟ ପେନାଲ୍ କଲୋନିରେ କାରାଦଣ୍ଡ ଭୋଗୁଥିବା ଦଳେ ମହିଳା କଏଦୀ ଭିୟାଚେସ୍ଲାଭ୍ ଭେଗ୍ନର୍ଙ୍କୁ ଭେଟିଥିଲେ। ନିଜସ୍ୱ ମତବ୍ୟକ୍ତ କରି ପ୍ରିଗୋଝିନ୍ ଜବାବ ଦେଲେ ଯେ, ଭେଗ୍ନର୍ଙ୍କ ପ୍ରସ୍ତାବରେ ସେ ସମ୍ପୂର୍ଣ୍ଣ ରାଜି। ଏହା ବିଶେଷ ଫଳପ୍ରଦ ହେବନାହିଁ। ଏଥିସହ ପ୍ରିଗୋଝିନ୍ ପୁଣି କହିଛନ୍ତି, ମହିଳା କଏଦୀମାନେ ଖାଲି ନର୍ସ ଓ କମ୍ୟୁନିକେସନ୍ ଅପରେଟର୍ ଭାବେ କାର୍ଯ୍ୟ କରିବା ଉଚିତ ନୁହେଁ। ବିଧ୍ୱସ୍ତକାରୀ ସଂଗଠନ ଓ ଲକ୍ଷ୍ୟଭେଦୀ ଗୁଳିଚାଳିକା ଯୋଡ଼ିରେ ମଧ୍ୟ କାର୍ଯ୍ୟ କରିବା ଉଚିତ। ଏହା ସବୁଆଡ଼େ ଚାଲିଥିବା କଥା ସମସ୍ତେ ଜାଣନ୍ତି। ଆମେ ସେ କ୍ଷେତ୍ରରେ କାର୍ଯ୍ୟ କରୁଛୁ। ଏଥିରେ ପ୍ରତିବନ୍ଧକ ଅଛି, କିନ୍ତୁ ମୋର ମନେହୁଏ ଆମେ ସଫଳ ହେବା।
