ନୂଆଦିଲ୍ଲୀ: ହ୍ୱାଟ୍ସଆପ ପକ୍ଷରୁ କରାଯାଇଥିବା ଏକ ଟ୍ୱିଟରେ ଭାରତର ଭୁଲ ମାନଚିତ୍ର ଦର୍ଶାଯାଇଥିବାରୁ ଖପ୍ପା ହୋଇଯାଇଛନ୍ତି ଭାରତର ଆଇଟି ମନ୍ତ୍ରୀ ରାଜୀବ ଚନ୍ଦ୍ରଶେଖର। ଶନିବାର ଦିନ କମ୍ପାନୀକୁ ଏକ ଚେତାବନୀ ଜାରି କରି ଯଥାଶୀଘ୍ର ଭୁଲ ସଂଶୋଧନ କରିବାକୁ ସେ କହିଛନ୍ତି। ହ୍ୱାଟସଆପ୍ ଦ୍ୱାରା ଟ୍ୱିଟ୍ କରାଯାଇଥିବା ଗ୍ରାଫିକ୍ସରେ, ଭାରତର ମାନଚିତ୍ରରେ ପାକିସ୍ତାନ ଅଧିକୃତ କାଶ୍ମୀର ଏବଂ ଚୀନ୍ ଦ୍ୱାରା ଦାବି କରାଯାଉଥିବା କିଛି ଭାରତୀୟ ଅଞ୍ଚଳକୁ ଛାଡି ଦିଆଯାଇଥିଲା। ଏହି ଗ୍ରାଫିକ୍ସ ଉପରେ ପ୍ରତିକ୍ରିୟା ପ୍ରକାଶ କରି ରାଜୀବ ଚନ୍ଦ୍ରଶେଖର ଏକ ଟ୍ୱିଟରେ କହିଛନ୍ତି ଯେ ଭାରତରେ ନିଜର ବ୍ୟବସାୟ ଚଳାଇବାକୁ ଚାହୁଁଥିବା କିମ୍ବା ଭାରତରେ ନିଜର ବ୍ୟବସାୟକୁ ଆହୁରି ବିସ୍ତାର କରିବାକୁ ଚାହୁଁଥିବା ଯେକୌଣସି ପ୍ଲାଟଫର୍ମ ଏପରି ଭୁଲ କରିବାରୁ ଦୂରେଇ ରହିବା ଉଚିତ୍। ଏବଂ ସର୍ବଦା ଭାରତର ସଠିକ୍ ମାନଚିତ୍ର ବ୍ୟବହାର କରନ୍ତୁ। ଏହି ଟ୍ୱିଟରେ ଚନ୍ଦ୍ରଶେଖର ‘ମେଟା’କୁ ମଧ୍ୟ ଟ୍ୟାଗ୍ କରିଛନ୍ତି। କାରଣ ମେଟା ( ପୂର୍ବର ଫେସବୁକ) ହେଉଛି ହ୍ୱାଟ୍ସଆପର ମୂଳ କମ୍ପାନି। ହ୍ୱାଟସଆପ୍ ପକ୍ଷରୁ ନୂଆ ବର୍ଷ ପାଇଁ ଏହାର ମଲଟି-ଲୋକେସନ ଲାଇଭଷ୍ଟ୍ରିମ ସଂପର୍କିତ ଏହି ଟ୍ୱିଟ କରାଯିବାର କିଛି ଘଣ୍ଟା ମଧ୍ୟରେ କେନ୍ଦ୍ର ମନ୍ତ୍ରୀ ଏହି ଭୁଲକୁ ଧରି ମେଟା ସମ୍ମୁଖରେ ରଖିଥିଲେ। ମନ୍ତ୍ରୀଙ୍କ ଟ୍ୱିଟ ଆସିବାର କିଛି ସମୟ ପରେ ହ୍ୱାଟ୍ସଆପ ଏହି ଟ୍ୱିଟକୁ ଡିଲିଟ କରିଦେଇଥିଲା।
ଭାରତରେ ଯଦି ବ୍ୟବସାୟ କରିବାକୁ ଚାହୁଁଛ, ଠିକ୍ ମାନଚିତ୍ର ଦେଖାଅ : ହ୍ୱାଟ୍ସଆପକୁ କେନ୍ଦ୍ରମନ୍ତ୍ରୀଙ୍କ ଚେତାବନୀ
Share Now: