ନରସିଂହପୁର : କଟକ ଜିଲ୍ଲା ନରସିଂହପୁର ପୁରୁଣା ଚକାମୁଣ୍ଡା ଗାଁରେ ଜଣେ ଲୋକ ନିଜର ବେକ କାଟି ଛାତ ଉପରୁ ତଳକୁ ଡେଇଁ ଆତ୍ମହତ୍ୟା କରିଥିବା ଘଟଣା ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି। ସେ ସାନ ଭାଇର ମୃତ୍ୟୁ ପରେ ସଂପୂର୍ଣ୍ଣ ଭାବେ ଭାଙ୍ଗି ପଡ଼ି ଏଭଳି ପଦକ୍ଷେପ ନେଇଥିବା କୁହାଯାଉଛି। ମୃତ ବ୍ୟକ୍ତିଙ୍କ ନାଁ ମଧୁସୂଦନ ଜେନା। ତାଙ୍କୁ ୫୪ ବର୍ଷ ହୋଇଥିଲା। ମାସେ ପୂର୍ବରୁ ତାଙ୍କ ପତ୍ନୀ ଚାଲି ଯାଇଥିଲେ। ଏଣେ ୧୫ ଦିନ ତଳେ ଏକ ଦୁର୍ଘଟଣାରେ ତାଙ୍କ ସାନ ଭାଇଙ୍କର ପ୍ରାଣ ହରାଇଥିଲା। ତେଣେ ତାଙ୍କ ପୁଅ(୨୦) ଜଣେ ଦୃଷ୍ଟିବାଧିତ। ମଧୁସୂଦନ ଜଣେ ଟ୍ରକ୍ ଚାଳକ। ସାନଭାଇ ଯଦୁନାଥର ରୋଜଗାରରେ ପରିବାର ଚଳୁଥିଲା। ସାନଭାଇର ହଠାତ୍ ଏମିତି ମୃତ୍ୟୁ ଘଟଣାକୁ ସେ ସହଜରେ ଗ୍ରହଣ କରିପାରୁ ନଥିଲେ। ସେଥିପାଇଁ ସବୁ ବେଳେ ଚିନ୍ତାଗ୍ରସ୍ତ ରହୁଥିଲେ ମଧୁସୂଦନ।
ଗତକାଲି ପଡ଼ୋଶୀ ଘରେ ବାହାଘରନେଇ ସମସ୍ତେ ବ୍ୟସ୍ତ ଥିବା ବେଳେ ହଠାତ୍ ଛାତ ଉପରକୁ ଯାଇ ସେ ଏକ ଧାରୁଆ ଅସ୍ତ୍ରରେ ନିଜ ବେକ କାଟି ଦେଇଥିଲେ। ତାପରେ ସେ ଛାତ ଉପରୁ ତଳକୁ ଡେଇଁ ଆତ୍ମହତ୍ୟା ଉଦ୍ୟମ କରିଥିଲେ। ତାଙ୍କୁ ତତକ୍ଷଣାତ୍ ନରସିଂହପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ହେଲେ ଅବସ୍ଥା ସଂକଟାପନ୍ନ ଥିବାରୁ ତାଙ୍କୁ ଗୁରୁତର ଅବସ୍ଥାରେ କଟକ ସ୍ଥାନାନ୍ତର କରା ଯାଉଥିବା ବେଳେ ମଧୁସୂଦନ ଜେନାଙ୍କର ମୃତ୍ୟୁ ଘଟିଥିଲା। ଶବବ୍ୟବଚ୍ଛେଦ ପରେ ଗାଁରେ ମୃତଦେହ ପହଞ୍ଚିବା ପରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା।
