ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଗୁରୁତ୍ୱପୂର୍ଣ୍ଣ ଆମେରିକା ଗସ୍ତ ଜୁନ ୨୧ରୁ ଆରମ୍ଭ ହୋଇ ଜୁନ ୨୪ ପର୍ଯ୍ୟନ୍ତ ଚାଲିବ। ଭାରତ-ଆମେରିକା ସଂପର୍କକୁ ଏହି ଗସ୍ତ ଏକ ନୂଆ ଉଚ୍ଚତାକୁ ନେଇଯିବ ବୋଲି କୁହାଯାଉଛି। ଏହା ପୂର୍ବରୁ ଗୁରୁବାରଦିନ ଭାରତର ପ୍ରତିରକ୍ଷା ମନ୍ତ୍ରଣାଳୟ ଆମେରିକାଠାରୁ ପ୍ରିଡେଟର ଡ୍ରୋନ ଚୁକ୍ତିକୁ ଅନୁମୋଦନ କରିଛି।
କୁହାଯାଉଛି ଯେ ଏହି ଚୁକ୍ତି ରେ ପାଖାପାଖି ୩ ବିଲିୟନ ଆମେରିକୀୟ ଡଲାର ଖର୍ଚ୍ଚ ହେବ। ଆମେରିକୀୟ କମ୍ପାନି ଜେନେରାଲ ଆଟୋମିକ୍ସ ଦ୍ୱାରା ନିର୍ମିତ ପ୍ରିଡେଟର ଡ୍ରୋନ୍ କିଣିବା ପାଇଁ ଭାରତ ଅନେକ ବର୍ଷ ଧରି ଆଗ୍ରହ ଦେଖାଉଥିଲା ଓ ଆମେରିକା ବି ଭାରତକୁ ବିକିବାକୁ ପ୍ରସ୍ତୁତ ଥିଲା। କିନ୍ତୁ ବିଭିନ୍ନ କାରଣରୁ ଏହା ବିଳମ୍ବିତ ହେଉଥିଲା। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆମେରିକା ଗସ୍ତ ପୂର୍ବରୁ ଏହି ଚୁକ୍ତିକୁ ନେଇ ପୁଣି ଚର୍ଚ୍ଚା ଆରମ୍ଭ କରିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆମେରିକା ଗସ୍ତ ପୂର୍ବରୁ ବାଇଡେନ ପ୍ରଶାସନ ଏହି ଚୁକ୍ତି ଉପରେ ଜୋର ଦେଉଥିବା କୁହାଯାଉଛି। ଏହି ଚୁକ୍ତିରେ ଆମେରିକାର ଆଗ୍ରହକୁ ଦୃଷ୍ଟିରେ ରଖି ଭାରତକୁ ଖୁବ୍ ଶୀଘ୍ର ଏ ସଂକ୍ରାନ୍ତରେ ନିଷ୍ପତ୍ତି ନେବାକୁ ପଡ଼ିଥିଲା। ଏହା ସହିତ ବିଶ୍ୱରେ ବଦଳୁଥିବା ସୁରକ୍ଷାସ୍ଥିତିକୁ ଦୃଷ୍ଟିରେ ରଖି ମଧ୍ୟ ଭାରତ ସରକାର ଏହି ଡିଲକୁ ମଞ୍ଜୁରୀ ଦେଇଛନ୍ତି। ତେବେ ପ୍ରତିରକ୍ଷା ମନ୍ତ୍ରାଳୟର ମଞ୍ଜୁରୀ ପରେ ଏହାକୁ ସୁରକ୍ଷା ସଂପର୍କିତ କ୍ୟାବିନେଟ କମିଟିର ମଞ୍ଜୁରୀ ପାଇଁ ରଖାଯିବ।
