ହାଇଦ୍ରାବାଦ: ଆପଣଙ୍କର ମନେ ଥିବ କର୍ଣ୍ଣାଟକରେ କିଛି ମାସ ତଳେ ହିଜାବ ବିବାଦ ଦେଖିବାକୁ ମିଳିଥିଲା। ତେବେ ବର୍ତ୍ତମାନ ତେଲେଙ୍ଗାନାରେ ଏବେ ଏହି ବିବାଦ ଦେଖାଦେଇଛି। ହାଇଦ୍ରାବାଦର ଏକ କଲେଜରେ କିଛି ଛାତ୍ରୀ ବୁର୍ଖା ପିନ୍ଧି ପରୀକ୍ଷା ହଲକୁ ଯାଇଥିବାବେଳେ ସେମାନଙ୍କୁ ପରୀକ୍ଷା ହଲରେ ପ୍ରବେଶ କରିବାକୁ ଅନୁମତି ଦିଆଯାଇନଥିବାର ଅଭିଯୋଗ ସାମ୍ନାକୁ ଆସିଛି। ଛାତ୍ରୀମାନେ ଅଭିଯୋଗ କରିଛନ୍ତି ଯେ ସେମାନଙ୍କୁ ଅଧ ଘଣ୍ଟା ଅପେକ୍ଷା କରିବାକୁ କୁହାଯାଇଥିଲା ଏବଂ ବୁର୍ଖା ଖୋଲିବା ପରେ ସେମାନଙ୍କୁ ପରୀକ୍ଷା ପାଇଁ ଅନୁମତି ଦିଆଯାଇଥିଲା। ମିଳିଥିବା ସୂଚନା ମୁତାବକ ଗତକାଲି ହାଇଦ୍ରାବାଦର କେ.ଭି ରଙ୍ଗାରେଡି ମହିଳା ଡିଗ୍ରୀ କଲେଜରେ କିଛି ଛାତ୍ରୀ ବୁର୍ଖା ପିନ୍ଧି ପରୀକ୍ଷା ଦେବାକୁ ଯାଇଥିଲେ। ତେବେ କଲେଜ ପ୍ରଶାସନ ସେମାନଙ୍କୁ ପରୀକ୍ଷା ହଲ ଭିତରକୁ ଯିବାକୁ ଦେଇ ନଥିଲା। ଛାତ୍ରୀମାନେ କହିଥିଲେ ଯେ ସେମାନେ ବୁର୍ଖା କାଢ଼ିବାକୁ ବାଧ୍ୟ ହୋଇଥିଲେ ଏବଂ ବୁର୍ଖା ପିନ୍ଧି ପରୀକ୍ଷା ହଲକୁ ଯାଇପାରିବେ ନାହିଁ ବୋଲି କୁହାଯାଇଥିଲା। ପରୀକ୍ଷା ଦେବାକୁ ହେଲେ ବୁର୍ଖା କାଢ଼ିବାକୁ ପଡିବ ଓ ପରୀକ୍ଷା ସରିବା ପରେ ବୁର୍ଖା ବାହାରେ ପିନ୍ଧି ପାରିବ ବୋଲି କୁହାଯାଇଥିଲା।
ଯେତେବେଳେ ତେଲେଙ୍ଗାନା ଗୃହମନ୍ତ୍ରୀ ମେହବୁବ ଅଲିଙ୍କୁ ଏହି ବିଷୟରେ ପଚରାଯାଇଥିଲା, ସେ କହିଥିଲେ ଯେ ସମସ୍ତେ ନିଜ ପସନ୍ଦର ପୋଷାକ ପିନ୍ଧିପାରିବେ କିନ୍ତୁ ଛୋଟ ପୋଷାକ ପିନ୍ଧିବା ଉଚିତ ନୁହେଁ। ସେ ଆହୁରି ମଧ୍ୟ କହିଛନ୍ତି ଯେ ମହିଳାମାନେ ବିଶେଷ ଭାବେ ସଚେତନ ହେବା ଉଚିତ୍ କାରଣ ଛୋଟ ପୋଷାକ ସମସ୍ୟା ସୃଷ୍ଟି କରିଥାଏ। ମେହବୁବ ଅଲି କହିଛନ୍ତି ଯେ “କିଛି ପ୍ରଧାନଶିକ୍ଷକ ଏହି ଭୁଲ କରିଛନ୍ତି। ବୁର୍ଖା ପିନ୍ଧିଥିବା ଛାତ୍ରୀଙ୍କୁ ସେମାନେ ପରୀକ୍ଷା ଦେବାକୁ ଅନୁମତି ଦେଇନଥିଲେ, କିନ୍ତୁ ଆମର ନୀତି ସଂପୂର୍ଣ୍ଣ ଧର୍ମନିରପେକ୍ଷ ଅଟେ। ଜଣେ ବ୍ୟକ୍ତି ଯାହା ଚାହାଁନ୍ତି ତାହା ପିନ୍ଧି ପାରିବେ, କିନ୍ତୁ ୟୁରୋପୀୟ ସଂସ୍କୃତି ପରି ପୋଷାକ ପରିଧାନ କରନ୍ତୁ ନାହିଁ, ଏହା ଭଲ ନୁହେଁ। ଆମର ସାଂସ୍କୃତିକ ପୋଷାକକୁ ସମ୍ମାନ ଦେବା ଉଚିତ ବୋଲି ମନ୍ତ୍ରୀ କହିଛନ୍ତି। ମହିଳାମାନେ ବିଶେଷ ଭାବରେ ଏହାର ଯତ୍ନ ନେବା ଉଚିତ୍। ଅନ୍ୟପକ୍ଷରେ ଯେତେବେଳେ ମନ୍ତ୍ରୀଙ୍କୁ କଲେଜରେ ବୁର୍ଖା ବ୍ୟାନ ବାବଦରେ ପଚରାଯାଇଥିଲା ସେତେବେଳେ ସେ କହିଥିଲେ ଯେ କୌଣସି ସ୍ଥାନରେ ବୁର୍ଖା ପିନ୍ଧିବା ଉପରେ କୌଣସି ପ୍ରତିବନ୍ଧକ ନାହିଁ। ସେ କଲେଜ ପ୍ରଶାସନ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ବିଷୟରେ କହିଥିଲେ।
