ବାଲିଅନ୍ତା : ଆଜି ସକାଳେ ଗୋପ କେନାଲରୁ ବାହାରିଥିବା ମାଇନର୍ କେନାଲ ବନ୍ଧ ଭାଙ୍ଗିଯିବାରୁ ସ୍ଥାନୀୟ ଡିହବାଲିଅନ୍ତା ମଝିଗଡ଼ ଗାଁରେ ପାଣି ପଶି ବନ୍ୟା ପରିସ୍ଥିତି ସୃଷ୍ଟି କରିଥିଲା। ଗାଁ ଦାଣ୍ଡ ବୁଡ଼ିଯିବାରୁ ଲୋକେ ସ୍ବାଭାବିକ ଭାବେ ଯାତାୟାତ କରିପାରିନଥିଲେ। ଏଣେ ଗାଁ ଦାଣ୍ଡରେ ବନ୍ୟା ସୃଷ୍ଟି ହୋଇଥିବା ବେଳେ ତଳମୁଣ୍ଡ ଜମିକୁ ପାଣି ଯାଇପାରିନଥିଲା। ଖବର ପାଇ ଜଳସମ୍ପଦ ବିଭାଗ କର୍ମଚାରୀମାନେ ବାଲିବସ୍ତା ପକାଇ ବନ୍ଧ ମରାମତି କରିଥିଲେ ବି ଗାଁ ଦାଣ୍ଡରେ ପାଣି ଜମି ରହିଥିଲା। କେନାଲ ମରାମତି କାମରେ ବ୍ୟାପକ ଅନିୟମିତତା ହେଉଥିବା ବେଳେ ନିମ୍ନମାନର କାମ ପାଇଁ ଏଭଳି ସ୍ଥିତି ଉପୁଜୁଛି ବୋଲି ଲୋକେ ଅଭିଯୋଗ କରିଛନ୍ତି।
ବେଣୁପୁର ଦେଇ ଯାଇଥିବା ଗୋପ କେନାଲରୁ କୁସୁଗାଡ଼ିଆଠାରେ ମାଇନର କେନାଲ ବାହାରିଛି। ମାଇନର କେନାଲ ଡିହବାଲିଅନ୍ତା ପର୍ଯ୍ୟନ୍ତ ଲମ୍ବିଛି। ଆଜି ବେହେରାସାହି ନିକଟରେ ଏହି କେନାଲ ବନ୍ଧ ଭାଙ୍ଗିଯାଇଥିଲା। ଫଳରେ କେନାଲ ପାଣି ସିଧା ମଝିଗଡ଼ସାହିରେ ପଶିଥିଲା। ଗାଁ ଦାଣ୍ଡରେ ପାଣି ଲହଡ଼ି ମାରିଥିଲା। ଏନେଇ ମଝିଗଡ଼ ଗ୍ରାମବାସୀମାନେ ଜଳ ସମ୍ପଦ ବିଭାଗର ଅଧିକାରୀଙ୍କୁ ଫୋନ୍ କରି ଅବଗତ କରାଇଥିଲେ। ଅବଶ୍ୟ ବିଭାଗୀୟ କର୍ମଚାରୀମାନେ ବାଲିବସ୍ତା ପକାଇ ବନ୍ଧ ମରାମତି କରିଥିଲେ। କିନ୍ତୁ ଗାଁ ଦାଣ୍ଡରୁ ପାଣି ନିଷ୍କାସନ ହୋଇନଥିବାରୁ ଗ୍ରାମବାସୀମାନେ ସମସ୍ୟାରେ ଅଛନ୍ତି। ଗ୍ରାମବାସୀମାନଙ୍କ କହିବା କଥା ଗତ ସପ୍ତାହ ତଳେ ଏହି ମାଇନର କେନାଲ ସଫେଇ କରାଯାଇଥିଲା। ଚଳିତ ବର୍ଷ ବିଳମ୍ବରେ ସଫେଇ କରାଯାଇଛି ଏବଂ କାମ ବହୁ ନିମ୍ନମାନର ହୋଇଛି। ସେହିଭଳି ବନ୍ଧର ଦୁର୍ବଳ ସ୍ଥାନ ମରାମତି କରାଯାଇନଥିଲା। ପୁଣି କେନାଲ ସଫେଇ ଏମିତି ଉପରଟାଉରିଆ ଭାବେ କରାଯାଇଛି ଯେ ପାଣି ତଳ ମୁଣ୍ଡକୁ ପହଞ୍ଚିପାରୁନାହିଁ। ତଳ ମୁଣ୍ଡରେ ଜମି ଶୁଖିଲା ପଡ଼ିଛି।
