ନୂଆଦିଲ୍ଲୀ: ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ)କୁ ଜ୍ଞାନବାପି ମସଜିଦରେ ସର୍ଭେ କରିବାକୁ ଆହ୍ଲାବାଦ ହାଇକୋର୍ଟ ଦେଇଥିବା ନିର୍ଦ୍ଦେଶ ବିରୋଧରେ ଅଞ୍ଜୁମାନ ଇନ୍ତେଜାମିଆ ମସଜିଦ୍ କମିଟି ଗୁରୁବାର ସୁପ୍ରିମ୍ କୋର୍ଟଙ୍କ ଦ୍ୱାରସ୍ଥ ହୋଇଛି। ଆଇନଜୀବୀ ନିଜାମ ପାଶା ଏହି ମାମଲାର ଜରୁରୀ ଶୁଣାଣି ପାଇଁ ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡ଼ଙ୍କ ନିକଟରେ ଉପସ୍ଥାପନ କରିଥିଲେ। ଧାରା ୩୭୦ ପ୍ରସଙ୍ଗରେ ଯୁକ୍ତି ଶୁଣାଣି କରୁଥିବା ୫ ଜଣିଆ ସାମ୍ବିଧାନିକ ଖଣ୍ଡପୀଠର ନେତୃତ୍ୱ ନେଉଛନ୍ତି ପ୍ରଧାନ ବିଚାରପତି।
ଆହ୍ଲାବାଦ ହାଇକୋର୍ଟ ଆଜି ଏକ ଆଦେଶ ଦେଇଛନ୍ତି। ଏହି ଆଦେଶ ବିରୋଧରେ ଆମେ ଏକ ଏସଏଲପି (ସ୍ପେଶାଲ ଲିଭ୍ ପିଟିସନ୍) ଦାଖଲ କରିଛୁ। ମୁଁ ଏକ ଇମେଲ୍ ପଠାଇଛି (ଜରୁରୀ ଶୁଣାଣି ପାଇଁ ଅନୁରୋଧ କରୁଛି)। ସେମାନେ ସର୍ବେକ୍ଷଣ ପ୍ରକ୍ରିୟାକୁ ଆଗକୁ ବଢ଼ାଇବା ଉଚିତ ନୁହେଁ ବୋଲି ସେ କହିଛନ୍ତି। ହିନ୍ଦୁ ପକ୍ଷର ଜଣେ ବ୍ୟକ୍ତି ମଧ୍ୟ ସୁପ୍ରିମ୍ କୋର୍ଟରେ ଏକ କ୍ୟାଭିଏଟ୍ ଦାଖଲ କରି କହିଛନ୍ତି ଯେ ଏହି ମାମଲାର ଶୁଣାଣି ନକରି କୌଣସି ଆଦେଶ ଦିଆଯିବା ଉଚିତ ନୁହେଁ। ସୂଚନାଯୋଗ୍ୟ, ଜ୍ଞାନବାପି ମସଜିଦ ପରିସରର ସର୍ଭେ ବିରୋଧରେ ଅଞ୍ଜୁମାନ ଇନ୍ତେଜାମିଆ ମସଜିଦ୍ କମିଟିର ଆବେଦନକୁ ଆହ୍ଲାବାଦ ହାଇକୋର୍ଟ ଗୁରୁବାରଦିନ ଖାରଜ କରିଦେଇଥିଲେ ଓ ସର୍ଭେ ପାଇଁ ଏଏସଆଇକୁ ଅନୁମତି ଦେଇଥିଲେ। ଅଞ୍ଜୁମାନ ଇନ୍ତେଜାମିଆ ମସଜିଦ୍ କମିଟି ଜ୍ଞାନବାପି ସମେତ ଅନେକ ମସଜିଦର ଯତ୍ନ ନେଉଛି।
