ନୂଆଦିଲ୍ଲୀ: କେରଳର କୋଲମରେ ସେନାର ଜଣେ ଯବାନଙ୍କୁ ଆକ୍ରମଣ ସହ ଅସଦାଚରଣ କରାଯାଇଥିବାର ମାମଲା ସାମ୍ନାକୁ ଆସିଛି। କୁହାଯାଉଛି ଯେ ଏହି ଯବାନଙ୍କୁ ୬ ଜଣ ଅଜ୍ଞାତ ବ୍ୟକ୍ତି ଆକ୍ରମଣ କରିଥିଲେ ଏବଂ ପରେ ତାଙ୍କୁ ଅତି ନିର୍ମମ ଭାବେ ମାଡ ମରାଯାଇଥିଲା। ଏହା ପରେ ଯବାନଙ୍କ ସାର୍ଟ ଚିରି ଦିଆଯାଇଥିଲା ଏବଂ ତାଙ୍କ ପିଠିରେ ନିଷିଦ୍ଧ ସଂଗଠନ ପିଏଫଆଇର ନାମ ଲେଖାଯାଇଥିଲା। ଯବାନ ଶିନେ କୁମାର ଏ ସମ୍ପର୍କରେ ସ୍ଥାନୀୟ ପୁଲିସ ନିକଟରେ ଅଭିଯୋଗ କରିଛନ୍ତି। ରବିବାର ରାତିରେ ଯବାନ ଜଣକ ତାଙ୍କ ଘରେ ଥିବାବେଳେ ଏହି ଘଟଣା ଘଟିଥିଲା। ଯବାନଙ୍କ ଅଭିଯୋଗ ମୁତାବକ ପ୍ରଥମେ ଦୁଇ ଜଣ ତାଙ୍କ ଘରେ ପ୍ରବେଶ କଲେ ଏବଂ ପରେ ଜବରଦସ୍ତ ତାଙ୍କୁ ନିକଟସ୍ଥ ରବର ଜଙ୍ଗଲକୁ ନେଇଗଲେ।
ସେଠାରେ, ଯବାନଙ୍କ ହାତ ଏବଂ ଗୋଡ ବାନ୍ଧିବା ପରେ ତାଙ୍କୁ ପିଟିପିଟି ପିଠିରେ ପିଏଫଆଇ ଲେଖାଯାଇଥିଲା। ଉଲ୍ଲେଖ ଥାଉ କି ଯେ ପିଏଫଆଇ ହେଉଛି ଏକ ନିଷିଦ୍ଧ ସଂଗଠନ ଯାହା ଉପରେ ଅର୍ଥ ହେରଫେର ଏବଂ ଆରଏସଏସ ନେତାଙ୍କ ଉପରେ ଆକ୍ରମଣ ଭଳି ଅନେକ ସଂଗୀନ ଅଭିଯୋଗ ରହିଆସିଛି। ଯବାନ ଜଣକ ରାଜସ୍ଥାନରେ ଡ୍ୟୁଟି କରୁଥିବାବେଳେ ଛୁଟିରେ କେରଳରେ ଥିବା ତାଙ୍କ ଘରକୁ ଆସିଥିଲେ। ଏହି ସଂଗୀନ ଘଟଣା ପରେ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଉଲ୍ଲେଖ ଥାଉ କି ରବିବାର ଦିନ ଏନଫୋର୍ସମେଣ୍ଟ ନିର୍ଦ୍ଦେଶାଳୟ ପିଏଫଆଇର ଅନେକ ସ୍ଥାନରେ ଚଢ଼ାଉ କରିଥିଲା ଏବଂ ସେହି ଦିନ ଯବାନଙ୍କୁ ତାଙ୍କ ଘରୁ ଅପହରଣ କରି ଏହି କାର୍ଯ୍ୟ କରାଯାଇଥିଲା। ତେବେ ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ପୁଲିସ ନିକଟସ୍ଥ ପିଏଫଆଇ କାର୍ଯ୍ୟାଳୟ ଏବଂ ସଦସ୍ୟଙ୍କ ଉପରେ ଅନୁସନ୍ଧାନ କରୁଛି। ଘର ଚାରିପାଖରେ ଥିବା ରାସ୍ତାରୁ ସିସିଟିଭି ଫୁଟେଜ ଯାଞ୍ଚ କରି ଅଭିଯୁକ୍ତକୁ ଚିହ୍ନଟ କରିବାକୁ ଚେଷ୍ଟା କରାଯାଉଛି।
