ଗୋଠରେ ଗୋଟିଏ ଦନ୍ତା, ୪ଟି ଛୁଆ ଓ ୧୧ଟି ମାଈ ହାତୀ
ବେତନଟୀ : ମୟୁରଭଞ୍ଜ ଜିଲ୍ଲା ବେତନଟୀ ରେଞ୍ଜକୁ ୧୬ଟିକିଆ ଝାଡ଼ଖଣ୍ଡି ହାତୀପଲ ପ୍ରବେଶ କରିଛନ୍ତି। ଝାଡଖଣ୍ଡର ଦଲମା ଜଙ୍ଗଲରୁ ଆସିଥିବା ଏହି ହାତୀପଲ ପଶ୍ଚିମବଙ୍ଗ ପରେ ରବିବାର ଭୋର ଭୋର ମୟୁରଭଞ୍ଜ ଜିଲ୍ଲା ବେତନଟୀ ରେଞ୍ଜଅଧୂନ ଅଶନବଣି ସଂରକ୍ଷିତ ଜଙ୍ଗଲରେ ପ୍ରବେଶ କରିଥିଲେ। ପରେ ଏହି ହାତୀପଲ ଦହିକୋଟି, ବଡ଼ଛୁରୁଣୀ, ଆଗ୍ରିଆ, ଯୁଗଳ ହୋଇ ବଗଲପୁର ନିକଟରେ ୧୮ନଂ ଜାତୀୟ ରାଜପଥ ଅତିକ୍ରମ କରିଥିଲେ।
ଏହି ୧୬ଟିକିଆ ହାତୀପଲରେ ଗୋଟେ ଦନ୍ତା ଓ ୪ଟି ଛୁଆ ସମେତ ୧୧ଟି ମାଈ ହାତୀ ଅଛନ୍ତି। ସେମାନେ ଆସିବା ରାସ୍ତାରେ ବ୍ୟାପକ ଧାନ ଫସଲ ମଧ୍ୟ ନଷ୍ଟ କରିଥିବା ସୂଚନା ମିଳିଛି। ସୁରକ୍ଷା ଦୃଷ୍ଟିରୁ ବେତନଟୀ ରେଞ୍ଜର ମନୁଆର ଖାନ ସମେତ ବହୁ ଫରେଷ୍ଟର, ଗାର୍ଡ ଓ ସବୁଜବାହିନୀ ଉପସ୍ଥିତ ରହି ହାତୀପଲକୁ ନିୟନ୍ତ୍ରଣ କରୁଥିବାବେଳେ ୧୮ନଂ ଜାତୀୟ ରାଜପଥ ଅତିକ୍ରମ କରିବା ସମୟରେ ଉଭୟ ପାର୍ଶ୍ଵରେ ଯାନବାହନକୁ ଚଳାଚଳକୁ ବି ନିୟନ୍ତ୍ରଣ କରିଥିଲେ। ହାତୀପଲ ୧୮ନଂ ଜାତୀୟ ରାଜପଥ ଏବଂ ରେଳପଥ ଅତିକ୍ରମ କରିବା ପରେ ସୋମବାର ଭୋର ନଡ଼ପୁର ସଂରକ୍ଷିତ ଜଙ୍ଗଲରେ ପ୍ରବେଶ କରିଛି। ତେବେ ହାତୀପଲଙ୍କ ଆଗମନ ଯୋଗୁଁ ଚାଷୀକୁଳ ତଥା ବେତନଟୀ ବନାଞ୍ଚଳବାସୀ ଭୟଭିତ ହୋଇପଡିଥିବା ଦେଖିବାକୁ ମିଳିଛି। ତେବେ କିଛି ଦିନର ବ୍ୟବଧାନ ପରେ ପୁଣି ଥରେ ହାତୀପଲ ବେତନଟୀ ମୁହାଁ ହେଉଥିବା ବେଳେ ହାତପଲ ଉକ୍ତ ଅଞ୍ଚଳରେ କେତେଦିନ ଉପଦ୍ରଵ କରି କେବେ ଗତିପଥ ନୀଳଗିରି ମୁହାଁ ହେବକି ନାହିଁ ନିରୀକ୍ଷଣ କରିବା ସହିତ ଜଙ୍ଗଲ ପାର୍ଶ୍ୱବର୍ତ୍ତୀ ଗ୍ରାମର ଲୋକଙ୍କୁ ସଚେତନ କରାଇଛି ବନବିଭାଗ।
