ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (୩୦ ତାରିଖ) ଉତ୍ତର ପ୍ରଦେଶର ଅଯୋଧ୍ୟା ଗସ୍ତ କରି ନବୀକରଣ ହୋଇଥିବା ରେଳଷ୍ଟେସନକୁ ଉଦଘାଟନ କରିବା ସହ ନୂଆ ବିମାନବନ୍ଦର ବି ଉଦ୍ଘାଟନ କରିଛନ୍ତି। ପ୍ରଧାନମନ୍ତ୍ରୀ ଅଯୋଧ୍ୟାରେ ପହଞ୍ଚିବା ପରେ ଦେଶର ଅନେକ କଳାକାର ମିଶି ତାଙ୍କୁ ସ୍ୱାଗତ କରିଥିଲେ। ମୋଦୀ ରେଳ ଷ୍ଟେସନକୁ ଯିବା ବାଟରେ ଏକ ରୋଡ୍ ସୋ’ କରିଥିଲେ। ଏହି ରୋଡ୍ ସୋ’ରେ ୧୪୦୦ରୁ ଅଧିକ ପ୍ରଦର୍ଶନକାରୀ ଅଂଶ ଗ୍ରହଣ କରି ସମୁଦାୟ ୪୦ଟି ପର୍ଯ୍ୟାୟରେ ସେମାନଙ୍କର ଲୋକକଳା ଓ ସାଂସ୍କୃତିକ କାର୍ଯ୍ୟକ୍ରମ ଉପସ୍ଥାପନ କରିଥିଲେ। ପରେ ପ୍ରଧାନମନ୍ତ୍ରୀ ମୋଦୀ ଏକ ସାଧାରଣ କାର୍ଯ୍ୟକ୍ରମରେ ମଧ୍ୟ ଅଂଶଗ୍ରହଣ କରିଥିଲେ, ଯେଉଁଠାରେ ସେ ୧୫,୭୦୦ କୋଟିରୁ ଅଧିକ ମୂଲ୍ୟର ଅନେକ ବିକାଶମୂଳକ ପ୍ରକଳ୍ପର ଉଦଘାଟନ କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଦିନ ଅଯୋଧ୍ୟା ଧାମ ଜଙ୍କସନର ଉଦଘାଟନ କରିବା ସହ ନୂତନ ଅମୃତ ଭାରତ ଟ୍ରେନ୍ ଏବଂ ବନ୍ଦେ ଭାରତ ଟ୍ରେନକୁ ପତାକା ଦେଖାଇ ଶୁଭାରମ୍ଭ କରିଛନ୍ତି। ତାଙ୍କ ସହ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ ଅନ୍ୟମାନେ ଉପସ୍ଥିତ ଥିଲେ। ଷ୍ଟେସନ ବିଷୟରେ ରେଳମନ୍ତ୍ରୀ ମୋଦୀଙ୍କୁ ସୂଚନା ଦେଇଥିଲେ। ସୂଚନା ରହିଛି ଯେ ଅଯୋଧ୍ୟା ଧାମ ଜଙ୍କସନ ରେଳ ଷ୍ଟେସନ ୨୪୦ କୋଟିରୁ ଅଧିକ ଟଙ୍କା ବ୍ୟୟରେ ଶେଷ ହୋଇଛି। ତିନି ମହଲା ବିଶିଷ୍ଟ ରେଳ ଷ୍ଟେସନ୍ ବିଲ୍ଡିଂରେ ଲିଫ୍ଟ, ଏସ୍କଲେଟର୍, ଫୁଡ୍ ପ୍ଲାଜା, ପୂଜା ସାମଗ୍ରୀ ଦୋକାନ, କ୍ଲୋକ୍ ରୁମ୍, ଚାଇଲ୍ଡ କେୟାର୍ ରୁମ୍ ଏବଂ ୱେଟିଂ ହଲ୍ ଆଦି ରହିଛି।
