ମୁମ୍ବାଇ : ମହାରାଷ୍ଟ୍ରରେ ମରାଠା ସମ୍ପ୍ରଦାୟ ପାଇଁ ୧୦ଟି ସଂରକ୍ଷଣ ପାଇଁ ବାଟ ସଫା ହୋଇଯାଇଛି। ମଙ୍ଗଳବାର ଅପରାହ୍ନରେ ଏକନାଥ ସିନ୍ଦେ ସରକାର ବିଧାନସଭାରେ ସଂରକ୍ଷଣ ବିଲ୍ ଆଗତ କରିଥିଲେ, ଯାହାକି ଗୃହୀତ ହୋଇଛି। ଏହି ବିଲ୍ ଏବେ ବିଧାନ ପରିଷଦରେ ଉପସ୍ଥାପିତ ହେବ ଏବଂ ତାପରେ ରାଜ୍ୟପାଳଙ୍କ ଅନୁମୋଦନ ପରେ ଆଇନରେ ପରିଣତ ହେବ। ମୁଖ୍ୟମନ୍ତ୍ରୀ ଏକନାଥ ସିନ୍ଦେ ବିଧାନସଭାରେ ଏହି ସଂରକ୍ଷଣ ବିଲ୍ ଉପସ୍ଥାପନ କରିବା ସମୟରେ ଏହାକୁ ପୂର୍ଣ୍ଣ ସମର୍ଥନ ସହ ପାସ୍ କରିବାକୁ ନିବେଦନ କରିଥିଲେ। ତେବେ ଶାସକ ମେଣ୍ଟର ଗୃହ ଛଗନ ଭୁଜବଳଙ୍କ ସମେତ କିଛି ବିରୋଧୀ ନେତା ବିଲକୁ ବିରୋଧ କରିଥିଲେ।
ଏହାପରେ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ସର୍ବସମ୍ମତିକ୍ରମେ ଏହି ବିଲ୍ ପାରିତ କରିବାକୁ ନିବେଦନ କରିଥିଲେ, ଯେଉଁଥିରେ ବିରୋଧୀ ଦଳ ନେତା ବିଜୟ ଭେଡେଟିୱାର ରାଜି ହୋଇଥିଲେ। ଆଉ ଏହାପରେ ମରାଠା ସଂରକ୍ଷଣର ଏହି ବିଲ୍ ନିମ୍ନ ସଦନରୁ ସ୍ୱର ଭୋଟରେ ପାରିତ ହୋଇଥିଲା। ମହାରାଷ୍ଟ୍ର ରାଜ୍ୟ ପଛୁଆ ବର୍ଗ ଆୟୋଗ (ଏମଏସବିସିସି)ର ରିପୋର୍ଟ ଏବଂ ଡ୍ରାଫ୍ଟ ବିଲ୍ ମଙ୍ଗଳବାର ଅପରାହ୍ନରେ ମହାରାଷ୍ଟ୍ର ବିଧାନସଭାର ଦିନିକିଆ ସ୍ୱତନ୍ତ୍ର ଅଧିବେଶନରେ ଉପସ୍ଥାପିତ ହୋଇଛି। ମରାଠା ସଂରକ୍ଷଣକୁ ଅନୁମୋଦନ କରିବା ହେଉଛି ଏହି ଅଧିବେଶନର ମୁଖ୍ୟ ଏଜେଣ୍ଡା।
