କାଙ୍କେର: ଛତିଶଗଡ଼ର କାଙ୍କେର ଜିଲ୍ଲାରେ ରବିବାର ହୋଇଥିବା ଏନକାଉଣ୍ଟରରେ ଜଣେ ପୁଲିସ କନେଷ୍ଟବଳ ଓ ଜଣେ ମାଓବାଦୀ ନିହତ ହୋଇଛନ୍ତି। ବସ୍ତର ରେଞ୍ଜର ଆଇଜି ସୁନ୍ଦରରାଜ ପି କହିଛନ୍ତି ଯେ ଛୋଟବେଥିଆ ଥାନା ଅଧୀନ ହିଦୁର ଗ୍ରାମ ନିକଟ ଜଙ୍ଗଲରେ ସୁରକ୍ଷାକର୍ମୀଙ୍କ ଏକ ମିଳିତ ଟିମ୍ ମାଓ ବିରୋଧୀ ଅଭିଯାନରେ ବାହାରିଥିବା ବେଳେ ଏହି ଗୁଳିବିନିମୟ ହୋଇଥିଲା। ହିଦୁର ଜଙ୍ଗଲରେ ମାଓବାଦୀଙ୍କ ଉପସ୍ଥିତି ସମ୍ପର୍କରେ ନିର୍ଦ୍ଦିଷ୍ଟ ସୂଚନା ଆଧାରରେ ଏହି ଅପରେସନ ଆରମ୍ଭ କରାଯାଇଥିଲା। ଏହି ଅପରେସନରେ ସୀମା ସୁରକ୍ଷା ବଳ (ବିଏସଏଫ) ଓ ଜିଲ୍ଲା ଫୋର୍ସ ସମେତ ରାଜ୍ୟ ପୁଲିସର ଉଭୟ ୟୁନିଟ୍ ଜିଲ୍ଲା ରିଜର୍ଭ ଗାର୍ଡ (ଡିଆରଜି) ଓ ବସ୍ତର ଯୋଦ୍ଧାର ଯବାନମାନେ ସାମିଲ ହୋଇଥିଲେ।
ପାଟ୍ରୋଲିଂ ଟିମ୍ ଜଙ୍ଗଲକୁ ଘେରାଉ କରୁଥିବା ବେଳେ ମାଓବାଦୀମାନେ ସେମାନଙ୍କ ଉପରକୁ ଆଖିବୁଜା ଗୁଳି ଚଳାଇଥିଲେ। ଏହି ଗୁଳିବିନିମୟରେ ବସ୍ତର ଯୋଦ୍ଧାର କନଷ୍ଟେବଳ ରମେଶ କୁରେଥି ନିହତ ହୋଇଛନ୍ତି। ଘଟଣାସ୍ଥଳରୁ ଜଣେ ମାଓବାଦୀଙ୍କ ମୃତଦେହ ଓ ଏକେ-୪୭ ରାଇଫଲ ଜବତ କରାଯାଇଛି ବୋଲି ଆଇଜି କହିଛନ୍ତି। ଏବେବି ଘଟଣାସ୍ଥଳରେ ସର୍ଚ୍ଚ ଅପରେସନ ଜାରି ରହିଛି। ନକ୍ସଲଙ୍କ ଗୁଳିରେ ସହିଦ୍ ହୋଇଥିବା ରମେଶ କୁରେଥି କାଙ୍କେର ଜିଲ୍ଲାର ପଖାଞ୍ଜୁର ଅଞ୍ଚଳର ସଙ୍ଗମ ଗାଁର ବାସିନ୍ଦା ବୋଲି ଅଧିକାରୀ ଜଣକ କହିଛନ୍ତି।
