ପୁରୀ : ମହାପ୍ରଭୁଙ୍କ ରଥଯାତ୍ରା ବିଶୃଙ୍ଖଳାକୁ ନେଇ ଶ୍ରୀମନ୍ଦିର ପ୍ରଶାସନ କଠୋର ଆଭିମୁଖ୍ୟ ଗ୍ରହଣ କରିଥିବା ବେଳେ ବ୍ୟବସ୍ଥାବଳୀ ଉଲ୍ଲଂଘନ କରିଥିବା ୪୨ ଜଣ ସେବାୟତଙ୍କୁ ନୋଟିସ୍ କରିଛି। ଏହି ୪୨ ଜଣଙ୍କ ମଧ୍ୟରେ କିଛି ବରିଷ୍ଠ ସେବାୟତ ରହିଛନ୍ତି। ରଥଯାତ୍ରା ସମୟରେ ଏମାନେ ବ୍ୟବସ୍ଥାବଳୀ ଉଲ୍ଲଂଘନ କରିଥିବା ଅଭିଯୋଗ ହୋଇଥିଲା। ସିସିଟିଭି ଫୁଟେଜ୍ ଯାଞ୍ଚ ପରେ ଶ୍ରୀମନ୍ଦିର ପ୍ରଶାସନ ଏଭଳି ପଦକ୍ଷେପ ନେଇଛି। ଏହି ସେବାୟତମାନେ କାରଣ ଦର୍ଶାଇବା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ। ପ୍ରକାଶଥାଉକି, ମହାପ୍ରଭୁଙ୍କ ସ୍ନାନଯାତ୍ରାରୁ ନିଳାଦ୍ରୀ ବିଜେ ନୀତି ପର୍ଯ୍ୟନ୍ତ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏକ ବ୍ୟବସ୍ଥାବଳୀ କରାଯାଇଥିଲା। ରଥ ଉପରେ ଭକ୍ତଙ୍କୁ ନଚଢାଇବା, ଦାନଦକ୍ଷିଣା ନ ନେବା, ମହାପ୍ରଭୁଙ୍କୁ ଅବରୋଧ ନ କରି ଭକ୍ତଙ୍କୁ ଦର୍ଶନ ଦେବା, ମହାପ୍ରଭୁଙ୍କ ଆଗରେ ଠିଆ ନ ହେବା ପାଇଁ କଟକଣା ଜାରି କରାଯାଇଥିଲା। ମାତ୍ର କିଛି ସେବାୟତ ଏହାକୁ ଖୋଲାଖୋଲି ଉଲ୍ଲଂଘନ କରିଥିଲେ। ଦାନଦକ୍ଷିଣା ନେବା ସହିତ ରଥ ଉପରକୁ ଭକ୍ତଙ୍କୁ ଚଢାଇଥିବା ଭଳି ଗୁରୁତର ଅଭିଯୋଗ ଆସିଥିଲା। ମନ୍ଦିର ପ୍ରଶାସନ ପକ୍ଷରୁ ଲଗାଯାଇଥିବା କ୍ଲୋଜ୍ ସର୍କିଟ୍ କ୍ୟାମେରା ଯାଞ୍ଚ କରାଯିବା ବେଳେ ୪୨ ଜଣ ସେବାୟତ ବ୍ୟବସ୍ଥାବଳୀ ଉଲ୍ଲଂଘନ କରିଥିବା ଜଣାପଡିଥିଲା। ଏ ସଂପର୍କରେ ମନ୍ଦିର ପରିଚାଳନା କମିଟିରେ ଆଲୋଚନା ହେବା ପରେ ଏହି ସେବାୟତମାନଙ୍କୁ ନୋଟିସ୍ ଜାରି କରାଯାଇଛି।
