ଢେଙ୍କାନାଳ: ନୂଆଦିଲ୍ଲୀର ନିଜାମୁଦ୍ଦିନସ୍ଥିତ ତବଲିଗି ଜମାତ ସହ ଢେଙ୍କାନାଳର କରୋନା ଆକ୍ରାନ୍ତଙ୍କ ଲିଙ୍କ ଥିବା ଜଣାପଡ଼ିଛି। ତବଲିଗିରୁ ଫେରିଥିବା ଜଣେ ଧର୍ମ ପ୍ରଚାରକ ଗତ ମାସରେ ଢେଙ୍କାନାଳ ଆସିଥିଲେ। ଢେଙ୍କାନାଳ ସହରରେ ସେ ଆକ୍ରାନ୍ତଙ୍କ ପରିବାର ସହ ରହିଥିଲେ ବୋଲି ଜିଲ୍ଲାପାଳ ଉମେଶ ଚନ୍ଦ୍ର ବେହେରା ଗଣମାଧ୍ୟମକୁ ସୂଚନା ଦେଇଛନ୍ତି। ଏହା କରୋନା ସଂକ୍ରମଣର କାରଣ ହୋଇପାରିଥାଏ ବୋଲି ସନ୍ଦେହ କରାଯାଉଛି। ଡେଙ୍କାନାଳର ମହିଳା ଆକ୍ରାନ୍ତଙ୍କର କୌଣସି ଯାତ୍ରା ଇତିହାସ ନାହିଁ , ସେ ରାଜ୍ୟ କିମ୍ବା ଦେଶ ବାହାରକୁ ଯାଇ ନାହାନ୍ତି। କାରଣ ସେ ଘରୁ ବାହାରକୁ ଯାଇ ନାହାନ୍ତି। ତେବେ ରାଜ୍ୟ ବାହାରୁ ଆସିଥିବା ଧର୍ମ ପ୍ରଚାରକଙ୍କ ସଂସ୍ପର୍ଶରେ ସେ ଆସିଥିବା କଥା ଜଣାପଡ଼ିବା ପରେ ତାଙ୍କ ସମେତ ୧୫ ଜଣଙ୍କୁ ସରକାରୀ କ୍ୱାରେଣ୍ଟାଇନରେ ରଖାଯାଇଥିଲା ବୋଲି ଜିଲ୍ଲାପାଳ କହିଛନ୍ତି। ଏହି ୧୫ଜଣଙ୍କର ନମୁନା ପରୀକ୍ଷା ଲାଗି ପଠାଯାଇଥିଲା, ଯାହା ମଧ୍ୟରୁ ମହିଳାଙ୍କ ନମୁନା ପଜିଟିଭ ବାହାରିଛି। ଯେହେତୁ ସମସ୍ତ ସଂଦିଗ୍ଧଙ୍କୁ କ୍ୱାରେଣ୍ଟାଇନରେ ରଖାଯାଇଛି, ତେଣୁ ବିଶେଷ ସମସ୍ୟା ନାହିଁ। ଏମାନଙ୍କ ସଂସ୍ପର୍ଶରେ କେଉଁମାନେ ଆସିଥିଲେ, ତାହା ଯୋଗାଯୋଗ କରାଯାଉଛି। ସେମାନଙ୍କୁ ମଧ୍ୟ କ୍ଵାରେଣ୍ଟାଇନରେ ରଖାଯିବ। ଆକ୍ରାନ୍ତଙ୍କୁ ଚିକିତ୍ସା ଲାଗି କଟକ ଅଶ୍ୱିନୀ ହସ୍ପିଟାଲ ପଠାଯିବା ସହ ସେ ରହୁଥିବା ଅଞ୍ଚଳକୁ ସାନିଟାଇଜ୍ କରାଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି। ଧର୍ମ ପ୍ରଚାରକ ଜଣକ ଢେଙ୍କାନାଳର ସଂପୃକ୍ତ ମହିଳାଙ୍କ ପରିବାର ସହ ରହିଥିଲେ। ଅନ୍ୟପଟରେ ଧର୍ମ ପ୍ରଚାରକ ଜଣକ ଗତ ମାର୍ଚ୍ଚ ୧୭ରୁ କୁଆଡେ ଯାଇଛନ୍ତି, ତାହା ଜଣାପଡ଼ିନାହିଁ ବୋଲି ଶ୍ରୀ ବେହେରା ସୂଚନା ଦେଇଛନ୍ତି।
