ଭୁବନେଶ୍ୱର : ନୂଆପଲ୍ଲୀସ୍ଥିତ ଗଣପତି ବସ୍ତିକୁ ବିଏମ୍ସି ଆଜି କଣ୍ଟେନମେଣ୍ଟ ଜୋନ୍ (ଆବଦ୍ଧାଞ୍ଚଳ) ଘୋଷଣା କରିଛି। ଏଠାରେ ଆଜି ୧୪ଜଣ କରୋନା ଆକ୍ରାନ୍ତ ଚିହ୍ନଟ ହେବା ପରେ ବିଏମ୍ସି ପକ୍ଷରୁ ଏହି ବସ୍ତି ଓ ଏହା ନିକଟବର୍ତ୍ତୀ ଅଞ୍ଚଳକୁ ସିଲ୍ କରିଦିଆଯାଇଛି। ବିଏମ୍ସିରୁ ମିଳିଥିବା ସୂଚନା ଅନୁଯାୟୀ, ଏଠାରେ କିଛି ଦିନ ତଳେ ଜଣେ ଗର୍ଭବତୀ କରୋନା ଆକ୍ରାନ୍ତ ହୋଇଥିଲେ। ଏହାପରେ ତାଙ୍କ ପରିବାର ଲୋକ ଓ ପଡ଼ୋଶୀଙ୍କୁ ସଙ୍ଗରୋଧରେ ରଖାଯାଇଥିଲା। ଏଥିରୁ ଆଜି ୧୪ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏଥିରେ ୬ଜଣ ପୁରୁଷ ଥିବାବେଳେ ୮ଜଣ ମହିଳା ଅଛନ୍ତି। ବସ୍ତିର ୬ଜଣ ପୁରୁଷଙ୍କ ବୟସ ଯଥାକ୍ରମେ ୬୫ବର୍ଷ, ୩୭ବର୍ଷ, ୫୫ବର୍ଷ, ୫୬ବର୍ଷ, ୫୮ବର୍ଷ, ୪୬ବର୍ଷ। ସେହିପରି ୮ଜଣ ମହିଳାଙ୍କର ବୟସ ହେଉଛି ୪୦ବର୍ଷ, ୨୮ବର୍ଷ, ୩୨ବର୍ଷ, ୬୦ବର୍ଷ, ୨୩ବର୍ଷ, ୪୫ବର୍ଷ, ୨୯ବର୍ଷ ଓ ୨୪ବର୍ଷ। ଆକ୍ରାନ୍ତଙ୍କ ମଧ୍ୟରେ ଗର୍ଭବତୀ ମହିଳାଙ୍କ ପରିବାର ଲୋକଙ୍କ ସମେତ ପାଖ ଅଞ୍ଚଳର ଲୋକ ଥିବାରୁ ଏଠାରେ ଗୋଷ୍ଠୀ ସଂକ୍ରମଣର ଭୟ ରହିଛି। ତେଣୁ ବିଏମ୍ସି ପକ୍ଷରୁ ଏହି ଅଞ୍ଚଳକୁ କଣ୍ଟେନମେଣ୍ଟ ଜୋନ୍ ଘୋଷଣା କରାଯାଇଛି।
ବିଏମ୍ସି ସୂଚନା ଅନୁଯାୟୀ, ଗଣପତି ବସ୍ତିର ବୈରାଗୀ ଚରଣ ମିସନରୁ ତାରିଣୀ ମନ୍ଦିର, ତାରିଣୀ ମନ୍ଦିରରୁ ଅନ୍ନପୂର୍ଣ୍ଣା ମଣ୍ଡପ ଭାୟା ହାଟ, ଅନ୍ନପୂର୍ଣ୍ଣା ମଣ୍ଡପରୁ ବୈରାଗୀ ଚରଣ ମିସନ୍ ଭାୟା ପ୍ଲଟ୍ ନଂ ଏନ୍୬/୨ ପର୍ଯ୍ୟନ୍ତ ଅଞ୍ଚଳକୁ ସିଲ୍ କରାଯାଇଛି। ଏଠାରୁ ଯେପରି ଲୋକମାନେ ବାହାରକୁ ବାହାରିବେନି କି କୌଣସି ପ୍ରକାରର ସାମଗ୍ରୀ ପାଇବାରେ ଅସୁବିଧା ହେବନି ସେଥିପାଇଁ ବିଏମ୍ସି ସମସ୍ତ ଅତ୍ୟାବଶ୍ୟକ ସାମଗ୍ରୀ ଓ ଔଷଧ ଯୋଗାଇବ। ଲୋକମାନେ ୧୯୨୯ ନମ୍ବରରେ ଫୋନ୍ କରିବେ। ସେହିପରି ଏହି ଆବଦ୍ଧାଞ୍ଚଳ ମଧ୍ୟରେ ଥିବା ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ ବନ୍ଦ ରହିବ। ଏବେ ଏହି ଅଞ୍ଚଳରେ ଆକ୍ଟିଭ୍ ସର୍ଭେଲାନ୍ସ ଜୋରଦାର୍ କରାଯିବା ସହ ଆବଦ୍ଧାଞ୍ଚଳର ସମସ୍ତଙ୍କର କରୋନା ପରୀକ୍ଷା ହେବ।
