ତିହିଡି : ଭଦ୍ରକ ଜିଲ୍ଲା ତିହିଡି ଥାନା ଅନ୍ତର୍ଗତ ଯାମଜୋଡି ପଞ୍ଚାୟତ ଅଧୀନ ନୀଳକଣ୍ଠପୁର ଗ୍ରାମର କାଦମ୍ବିନୀ ସ୍ୱାଇଁ ନାମ୍ନୀ ଜଣେ ବଧୂକୁ ଯୌତୁକ ପାଇଁ ତାଙ୍କ ପରିବାର ଲୋକ ହତ୍ୟା କରିଥିବା ଅଭିଯୋଗ ହୋଇଛି। ଅଭିଯୋଗରୁ ଜଣାପଡିଛି ଯେ ଗତ ବର୍ଷ ଆଷାଢ଼ ମାସରେ ତିହିଡି ଥାନା ବୋଡ଼କ ପଞ୍ଚାୟତ ଅନ୍ତର୍ଗତ ଓରାଳିଗ୍ରାମର ରତ୍ନାକର ସ୍ୱାଇଁଙ୍କ ଝିଅ କାଦମ୍ବିନୀଙ୍କୁ ନୀଳକଣ୍ଠପୁର ଗ୍ରାମର ଭିକା ରାଉତଙ୍କ ପୁଅ ପଙ୍କଜ ରାଉତ ବୈଦିକ ରୀତିରେ ବିବାହ କରିଥିଲେ। ବିବାହ ସମୟରେ ବରପକ୍ଷଙ୍କ ଦାବି ମୁତାବକ ୧ଲକ୍ଷ ଟଙ୍କା ସହିତ ଅସବାବ ଜିନିଷ ଦିଆଯାଇଥିଲା। ମାତ୍ର ବିବାହର କିଛିଦିନ ପରେ ଶାଶୁଘର ଲୋକ ଅଧିକ ଯୌତୁକ ଦାବିକରି କାଦମ୍ବିନୀଙ୍କୁ ମାଡମାରିଥିଲେ। ଯୌତୁକ ଦେବାକୁ ମନାକରିବାରୁ ଶାଶୁଘର ଲୋକେ ମିଳିମିଶି ବୁଧବାର ରାତିରେ ହତ୍ୟା କରିଦେଇଛନ୍ତି। ଏହି ଖବର କାଦମ୍ବିନୀର ବାପା ରତ୍ନାକର ସ୍ୱାଇଁ ଗୁରୁବାର ସକାଳେ ଫୋନ ଯୋଗେ ଜାଣିବାକୁ ପାଇଲେ ବୋଲି ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଏ ସମ୍ପର୍କରେ ୨୭୦/୨୦ରେ ଏକ ମକଦ୍ଦମା ରୁଜୁକରି ଯାଆ ନୁଖୁରୀ ରାଉତ ଓ ଶାଶୁ ହେମଲତା ରାଉତକୁ ଗିରଫ କରିଛି।
